Paıǵambarymyz (s.ǵ.s.) tyıym salǵan esimder

Ata-ananyń aldynda balasyna jaqsy tárbıe berý men ımandylyqqa baýlýmen qatar taǵy bir basty mindet bar. Ol balaǵa – maǵynaly at qoıý. Dinimizdiń dińgegi keń etek jaıǵaly musylmansha at qoıý jaqsy úrdiske aınalyp keledi. Alaıda, balaǵa at berýde ardaqty Paıǵambarymyzdyń múldem tyıym salǵan esimderi de bar ekenin bilip júrgen jón.

Alla elshisi (c.ǵ.s.) nárestege puttardyń atyn berýdi, jalpy maǵynasy ıslamǵa múldem jat esimderdi berýge tyıym salǵan. Mysalǵy, Paıǵambarymyzdyń (c.ǵ.s.) dáýirinde keń tarap ketken attardyń biri – Sanam. Sanam – áıel sulýlyǵynyń sımvoly bolǵan puttyń esimi. Súıikti elshimiz (s.ǵ.s.) bul atty qoıýǵa ózi tyıym salǵan, sol kezderi bilmestikpen osy esimdi ıelengender, maǵynasy bar jaqsy attarǵa aýysyp jatty.

Sondaı-aq, balany Alla Taǵalanyń esimderiniń birimen ataý da durys emes. Eger aldyna «abd» tirkesin qoıatyn bolsa ruqsat. Mysaly, Abdýlla, maǵynasy «Allanyń quly». Mundaı esim musylmandardyń arasynda keń taralǵan ári maǵynasy da kelisti.

Ábý Hýraıra (r.a.) atymen belgili sahabanyń ata-anasy oǵan Abdýsh-Shams dep esim bergen eken, ıaǵnı Kúnniń quly dep. Rasýlalla (c.ǵ.s.) sahabanyń esiminiń durys qoıylmaǵanyn eskertip, ony Abdýr-Rahman, Meıirimdi Allanyń quly degen atqa aýystyrdy.

Esimderdi qysqartyp, aldyńǵy maǵynasynan múldem ózgertip aıtý da quptalmaıtyn is. Paıǵambarymyzdyń (c.ǵ.s.): «Sender qııamet kúni óz esimderińmen jáne ákelerińniń esimderimen shaqyrylasyńdar. Olaı bolsa, balaǵa ádemi esim qoıyńdar» - degen hadısin ısi musylman jan esten shyǵarmaǵan jón.