Paıǵambarymyzdyń (s.ǵ.s.) áıelderge qatysty aıtqany
Muhammed Paıǵambar (s.ǵ.s.) – Allanyń eń súıikti quly. Alla elshisi osy dúnıe men o dúnıeniń úlken syıyna – Alla Taǵalanyń razylyǵyna ıe bolǵan. Bizdiń de Allanyń razylyǵyna ıe bolardaı múmkindigimiz bar. Ol úshin Alla Elshisiniń (s.ǵ.s.) aıtqandaryna qulaq túrý qajet:
1. Muhammed Paıǵambar (s.ǵ.s.): «Eger áıel adam bes mezgil namaz oqyp, ramazanda oraza ustap, danalyq tanytyp, óziniń erin tyńdasa oǵan: «Jumaqqa qalaǵan esigińnen kir!» delinedi», – deıdi.
2. «O, áıelder! Kóbirek sadaqa berińder. Shynynda, senderdiń Tozaqta kóp ekenderińdi kórdim».
3. «Senderdiń táspi, tahlıl jáne taqdıs jasaǵandaryń jón! Jáne saýsaqtaryńmen sanańdar. Sebebi, olar Qııamet kúninde suralyp, sóıleıtin bolady!»
4. Alla Elshisi (s.ǵ.s.) ansarlardyń ishindegi Úmmı Sınan esimdi áıel adamǵa: «Bizben birge qajylyqqa barýyńa ne kedergi boldy?» – dep suraıdy. Sonda Úmmı Sınan: «Ábý Fýlıannyń (eri) eki túıesi bar edi, bireýine Ábý Fýlıan men onyń uly mingesti, ekinshisine bizdiń qyzmetshimiz mindi», – dep jaýap beredi. Sonda Paıǵambarymyz (s.ǵ.s.): «Ramazandaǵy ýmra menimen birge jasaǵan qajylyqqa teńeledi», – degen eken.
5. «Túnde uıqysynan turyp, áıelin oıatatyn, áıeli turýǵa erinse, betine sý búrkıtin er adamdy Alla jarylqasyn! Túnde uıqysynan turyp, erin oıatatyn, eri turýǵa erinse, betine sý búrkıtin áıeldi Alla jarylqasyn!»
6. «Seniń óz bólmeńde jasaǵan qulshylyǵyń syrtqy bólmede jasaǵan qulshylyǵyńnan jaqsy, al syrtqy bólmede jasaǵan qulshylyǵyń aýlada jasaǵan qulshylyǵyńnan jaqsy, al aýlada jasaǵan qulshylyǵyń óz taıpańnyń meshitinde jasaǵan qulshylyǵyńnan jaqsy, al óz taıpańnyń meshitinde jasaǵan qulshylyǵyń meniń meshitimde jasaǵan qulshylyǵyńnan jaqsy».
7. Aısha anamyz (r.a.) Muhammed Paıǵambarymyzdan (s.ǵ.s.): «O, Allanyń elshisi! Jıhad kúresterdiń eń jaqsysy ekenin bilemiz. Bizge sony jasasaq bolmaı ma?» –dep suraıdy. Sonda Alla Elshisi (s.ǵ.s.): «Áıelderdiń eń jaqsy kúresi – bul taqýalyqpen jasalǵan qajylyq», – dep jaýap bergen eken.
8. Paıǵambarymyzǵa (s.ǵ.s.) áldekim: «O, Allanyń elshisi! Bir áıel túnde qulshylyq qylady, kúndiz aýyz bekitedi, jaqsylyq jasaıdy jáne sadaqa beredi, biraq kórshilerin tilimen shaǵyp sóıleıdi», – deıdi. Alla Elshisi (s.ǵ.s.) buǵan: «Munda esh jaqsylyq joq. Ol Tozaqty mekendeýshilerdiń biri», – deıdi. Basqa bireý: «Bir áıel paryz bolǵan namazdardy oqıdy, sadaqa retinde irimshik taratady jáne eshkimge jamandyq jasamaıdy», – degende, Alla elshisi (s.ǵ.s): «Ol áıel Jumaqty meken etýshilerden», – degen eken.
9. «Eger men Alladan basqa bireýge sájde etýdi buıyra alar bolsam, áıeliniń erine sájde qylýyn buıyrar edim. Áıel adam óz eriniń haqyn tolyq oryndamaıynsha, Alla Taǵalanyń aldyndaǵy óz mindetin tolyq oryndamaıdy».
10. Alla Elshisinen (s.ǵ.s.) aınalasyndaǵylar: «Eń jaqsy áıel qandaı bolady?» – dep suraıdy. Alla Elshisi (s.ǵ.s.): «Qaraǵanda erin qýantatyn, ol buıyrǵanda oǵan baǵynatyn jáne ózine nemese óziniń múlkin qalaı jumsaǵanyna qatysty erine birdeńe unamasa, oǵan qarsy kelmeıtin áıel», – degen eken.
Ámına Omarova
