Perishtesi qaǵypty...

Biz asa oılana bermeıtin jaratylys bar. Olar bizdiń ómirimizde erekshe mańyzǵa ıe. Táýligine jıyrma tórt saǵat bizden bir eli ajyramaıtyn jaratylys. Adam balasynyń ǵumyryna belsendi úles qosady. Ol – perishteler.

Perishte – nurly jaratylys. Sondyqtan qalaǵan beınege ene alady. Olar toqtaýsyz jáne sharshaýsyz qulshylyq etedi. Perishteler ishinde kúnáhary nemese kápiri degen bolmaıdy. Erkek jáne áıel dep te bólinbeıdi. Sonymen birge, tamaq ishýge jáne demalýǵa muqtajdyǵy joq. Adam balasy áli ana qursaǵynda jatqan shaqtan bastap perishtemen tyǵyz baılanysqa túsedi. Alla Taǵala árbir sharanaǵa arnaıy bir perishte bekitedi. Ol ana qursaǵyndaǵy balanyń qalyptasý kezeńin tolyǵymen baqylaıdy. Árıne, Jaratýshy eshbir tirshiliktiń kómegine júginbeıdi. Muqtaj da emes. Bul –Alla Taǵalanyń adam balasyna degen erekshe qamqorlyǵynyń bir kórinisi. 

Quran Kárimde:  «Alla, perishtelerden elshiler belgiledi...[1]»,-dep aıtylǵandaı, perishteler ishinde Jábireıil, Mıkaıl, Israfıl, Ázireıil esimderi erekshe atalady. Sonymen birge, jánnat kúzetshisi – Rıdýan, tozaq saqshysy – Malık jáne Arshyny kóterip turǵan perishteler bar. Munan basqa kóptegen perishteler bar. Perishtelerdiń dáreje jaǵynan eń úlkeni – Jábireıil. Quran Kárimde: «Oǵan ony óte kúshti úıretti[2]»,-dep, paıǵambarymyzǵa (s.ǵ.s.) Alla Taǵala ámirimen ýahı ákelýshi perishte ekenin aıtýda. Jábireıildi Quranda «Ol qýat ıesi...[3]»,-dep sýretteıdi. Aqıqatynda, hadısterdegi perishtelerdiń bolmysy týraly aıtylǵan sózderge zer salsaq, adam balasynyń aqylyna syımaıtyn dárejede ǵajaıyp jaratylysqa kýá bolamyz. Sonymen birge, Alla Taǵalanyń qudiretine taǵy bir ret bas ıemiz. Hadıste Jábireıildiń alty júz qanaty bar jáne qanattary arasynan marjan men jaqut jarqyrap shashylyp turady delingen.

Taǵy bir rıýaıatta paıǵambarymyz (s.ǵ.s.) Mekke mańaıyndaǵy Ajııad degen jerde bolady. Sonda Jábireıil adam beınesinde túsip: «Rabbyńnan meni bastapqy beınemde kórýdi sura»,-deıdi. Sonda Jábireıil batys pen shyǵysty kóleńkelep qalady. Muny kórgen paıǵambar (s.ǵ.s.) esinen tanyp qalady. Esin jıǵan kezde janynda adam beınesindegi Jábireıildi kórip, qushaǵyna qysyp: «Eı, Jábireıil! Alla Taǵala mundaı beınede bireýdi jaratqan eken dep oılamaǵan edim»,-deıdi. Sonda perishte: «Alla Taǵala meni alty júz qanatty etip jaratqan, men tek eki qanatymdy ǵana jaıdym. Al, Israfıldi alty júz qanatty etip jaratqan, onyń bir qanaty meniń barlyq qanatymnyń kólemindeı»,-degen eken.

Sol sııaqty, Arshyny kóterip turǵan perishteler tórteý, al qııamet kúni olardyń sany segiz bolatyndyǵy jaıly rıýaıat etilgen. Olardyń beınesi hadıste bylaı sýrettelgen: olardyń árbiriniń qulaǵynyń syrǵalyǵy men ıyǵynyń arasy jyldam qus jeti júz jylda ushyp jetedi. Olar Arshyny ıyǵyna salyp kóterip turady da, al aıaqtary jeti qabat jer astynda,-delingen.

Qazaqta apattan aman qalǵan adam jaıly «perishtesi qaǵypty» degen sóz bar. Bul degenińiz adam balasyn Allanyń qalaýymen tosyn apat pen jaǵdaıdan qorǵaıtyn perishteler bar ekenin ańǵartady.

[1] Haj súresi, 75-aıat
[2] Nájim súresi, 5-aıat
[3] Nájim súresi, 6-aıat