QARLYǴAShQA BOLYSÝ!

Qarlyǵashtyń uıasyn buzbaý úshin jumysynan da bas tartýǵa daıyn ekenin aıtqan azamattyń vıdeosyn kórdik. Áserlendik. “Qarlyǵash áýlıe atanǵan” Tóle bı babamyzdyń jolynan aýytqymaǵan urpaqtyń áli de jalǵasyp kele jatqanyna kýá boldyq. Bir oqyrmanymyz “jigittiń jasaǵany durys pa, burys pa?” dep pikir surapty.
Jer basyp júrgen jan-janýarlar men qustar óz aldyna bir úmbet (“Ánǵam” 6/38), bulardyń barlyǵy Jaratqanyn kemshilikten páktep, ulyqtap, Ony zikir etedi (“Juma”, 62/1).
Sondyqtan da, naqaqtan-naqaq bir torǵaıdy óltirgennen Jaratqan Qııamette esep suraıtynyn hadısterden jaqsy bilemiz (Darımı, “Ádahı”, 16; Násaı, “Dahaıa”, 42).
Uıasynan qustyń balapandaryn alyp kelgen adamnyń mańaıynan shyr-pyr bop aınalshyqtap ketpeı qoıǵan qusty kórgen Paıǵambarymyz (Allanyń oǵan ıgiligi men sálemi bolsyn) álgi adamdy azarlap, dereý keri aparýyn ámir etkeninen de hadısterden habardarmyz (Ábý Dáýit, “Jıhad”, 112; Ábý Dáýit, “Jánaız”, 1).
Shól qysqan ıtke sý bergen adamǵa Allanyń razy bop, kúnásin keshirgenin (Buharı “Shýrb”, 9), mysyqty ashtan-ash qamap qoıyp óltirgen áıeldiń tozaqtyq ekenin de (Buharı, “Ánbııa”, 54) Paıǵambarymyzdyń habarlarynan oqyp-bilgenbiz.
Minis kóligine artyq júk tıeýden, tipti at ne túıe ústinde uzaq áńgimelesip turýdan da dinimiz tııady (Ábý Dáýit, “Jıhad”, 55).
Ardaqty Elshimiz maldyń ózin qınamaı soıý úshin kózinen tasa jerde pyshaqty ábden qaıraýdy ámir etken (Múslım, “Saıd”, 57). Tuıaq serpip jeńil jan tapsyrý úshin de bir aıaǵyn baılamaı bos jiberý de – súnnet. Mine, meıirimdilikke nasıhattaǵan osyndaı dinniń ókilimiz.
“Meıirimdilik tanytpaǵan meıirimdilikke bólenbeıdi” (Buharı, “Ádep”, 18) degen Paıǵambardyń úmbetimiz.
“Zalaly tıe berse muqym janǵa,
Rahymsyz, qaıyrymsyz bop qysylǵanǵa,
Ne dúnıe, ne bolmasa aqırette
Bolar-aq bir qıyndyq shybyn janǵa!” (Shákárim) degen babanyń urpaǵymyz.
Sondyqtan da, qarlyǵashqa bolysqan meıirimdi jannyń áreketi oń! Jer keń ǵoı, qubyrdy basqa jerden de ótkizýge bolady. Paıǵambarymyz da kúshikterin emizip jatqan ıtti mazalamaý úshin basyna kúzet tigip, Mekkege bet alyp bara jatqan jer qaıysqan áskeriniń basyn basqa jaqqa buryp, aınalyp ótti emes pe?!
Saltan SAIRANULY