Qajylyqta qabyl bolǵan duǵa

Qaıbir jyly qajylyqqa barǵan bir kisiniń basynan ótken osy oqıǵany estip, tań qaldym.

Orta jastaǵy bir áıeldiń minezi óte qıyn eken. Ashýy tez tutanyp, lap ete túsetin, sondaı «kúsheıgen» kúıinde kisige talaı aýyr sóz aıtyp tastaıtyn aýzy jeńil, tili ashy adam bolsa kerek. Árıne, qaıtymy tez desedi, biraq ashýy qurǵyr «qaıtamyn» degenshe de bu kisi shaıpaý tilimen talaı adamnyń júregin shanshyp, janyn jaralap úlgeretin kórinedi.

Kúnderdiń kúninde perzentteri anasyn Mekkege  qasıetti qajylyq saparǵa jibermek bolady. Áıel jolǵa shyǵar aldynda Qudaıǵa jalbarynyp, qaıta-qaıta duǵa jasaıdy: «E, meıirimdi Jaratqan, men qurysam tilimnen, minezimnen qurımyn. Kıeli jerge tabanym tıip, uly paryzdy oryndaý ústinde de bireýlermen ursysyp, janjaldasyp qalmaıtyndaı bir ǵalamat halge túsirshi! Maǵan sol kúnderde sabyr bere górshi, tózim bere górshi!».

Aqyry qajylyq sapar bastalady. Alǵashqy kúnder sátti ótedi (bara salyp kimmen uryssyn, oǵan shamasy da bolmaǵan shyǵar). Mekkeden shyǵyp, Mına jazyǵyna attanar tusta apamyz adasyp ketedi. Mıllıondaǵan adam qumyrsqasha qujynaǵan saparda júrip, Qazaqstannan ózimen birge barǵan toptan kóz jazyp qalady. «Úıirinen ajyrap», sendelip júrgen beıtanys áıeldiń jaǵdaıyn túsingen pákistandyq qajylar ony ózderiniń áıelder tobyna qosyp alady. Apamyz kúnde solarmen bir shatyrda tynyǵady, birge qulshylyq qylady, birge as-sý ishedi. Áıteýir ym-ıshara arqyly ǵana uǵysady. Sóıleseıin dese, olardyń tilin bul bilmeıdi, munyń sózin olar túsinbeıdi. Ursysý tipti múmkin emes!

Tek elge qaıtar kún taıaǵanda ǵana apamyz áldebir meshitten bir top qazaq kórip qalyp, qushaǵyn jaıa umtylady. Solardan surastyryp júrip, óz tobyn taýyp alady. Sóıtip, eshkimmen uryspaı, eshkimge aýyr sóz aıtpaı, keremet kóńilmen, qajylyq paryzyn oryndap, elge qaıtqan eken.