QAJYLYQTYŃ HIKMETI
Alla Taǵala Adam (a.s.) paıǵambarǵa:
«Ýa, Adam! Men úshin jer betinde kóktegi Qaǵbamnyń tusyna bir Qaǵba turǵyz, perishteler kóktegi Qaǵbany (Báıt ál-Maǵmýr) aınala taýaf etkendeı, sen jáne urpaqtaryń da sony aınala taýaf etip maǵan qulshylyq etińder» - dep buıyrdy.
Adam paıǵambar Mekkege kelip Qaǵbany turǵyzdy.
Sosyn Jaratýshy Haqqa bylaı dep jalbaryndy:
«Ýa, Rabbym! Rasynda ár eńbek etkenniń aqysy bolady, meniń de óteýim bar». Alla Taǵala:
«Iá, bar. Menen qalaǵanyńdy sura» - dedi. Adam paıǵambar:
«Ýa, Rabbym! Meni qaıtadan jánnatqa jiber» - dedi. Alla Taǵala:
«Bul sen úshin (aqyrette) júzege asady» - dedi.
Haziret Adam:
«Ýa, Rabbym! Meniń qatelerimdi moıyndaǵanym sekildi, urpaqtarymnyń kúnálaryn moıyndap, saǵan jalbarynyp myna Qaǵbany taýaf etkenderdi de keshirgenińdi suraımyn» - dedi. Alla Taǵala:
«Ýa, Adam! Men seni keshirdim. Seniń urpaqtaryńnan myna Qaǵbany zııarat etip kúnálarynan táýba etýshilerdi de keshirdim» - dedi. Nuh paıǵambar zamanynan Ibrahım (a.s.) dáýirine deıin Qaǵba Mýazzamanyń turǵan jeri beımálim boldy.
Alla Taǵala haziret Ibrahımge Qaǵbany turǵyzyp, adamdardy qajylyqqa shaqyrýyn buıyrdy. Ibrahım (a.s.):
«Ýa, Rabbym! Buǵan daýsym jetpeıdi» - dedi. Alla Taǵala:
«Sen shaqyr, estirtý Bizge tán» - dedi. Sodan keıin Ibrahım paıǵambar Maqam Ibrahımniń ústine shyǵyp qarap, búkil jer júzin, taýlar men alqaptardy, qurlyqtar men teńizderdi, adamdar men jyndardy – bárin alaqandaǵydaı kórdi.
Qoldaryn qulaǵyna aparyp shyǵys pen batysqa, teriskeı men kúngeıge (ońtústik jáne soltústik) burylyp bylaı dep daýystady:
«Ýa, adamdar! Qaǵbany zııarat etý senderge paryz boldy. Rabbylaryyńnyń shaqyrýyna boısunyp, kelińder». Ibrahım (a.s.) dáýirinen búginge deıin qajylyqqa barǵandar – onyń osy shaqyrýyna «lábbaık, lábbaık!» - degender. Kimde-kim sol kezde Ibrahım paıǵambardyń shaqyrýyna qansha ret «lábbáık» - dep jaýap bergen bolsa, oǵan sonsha márte qajylyq násip bolady. (Lábbaık: Ámirińe quldyq degen sóz)
