"QOLYŃDY ARTYŃA AIQASTYRMA"

Tutqynǵa túsken adamnyń qoly artyna qaıyrylyp baılanyp, buǵaýlanady. Keıbir beli aýyratyn qart kisiler súıenish retinde qolyn artyna ustaıtyny bolmasa, bylaıǵy adamdar, ásirese jastar bul ádetten aýlaq bolǵan eken. "Jamandyq shaqyrady" deıtin osy tyıymnyń erteden qalǵan ózindik astary bar...

Taǵdyry myń búktelip, myń silkingen halqymyzdyń basynan nebir alaquıyn alasapyran dáýirler ótken. Eli shabylyp, jeri talanyp, ul-qyzdary baılanyp-matalyp jaý qolynda ketken zar-zamandardy kórgen. Mynaý jaryq jalǵanda adam úshin bostandyqtan, azattyqtan artyq qymbat qazyna joq ekenin bilse, QAZAQ bilsin!

Kiriptarlyqtyń ne ekenin jan-júregimen túsingendikten:

"Alla pendesin erkindiginen ajyratpasyn!" - dep tilek tilep, "Qolyńdy artyńa aıqastyrma", - dep tyıym aıtqan. Búginde qaısybir jap-jas bastyqtardyń, qaltasy qalyń baı jigitterdiń qolyn artyna ustap, ıegimen nusqap sóıleıtinderin kórip júrmiz. Osynyń ózi, túsingen kisige - KESIRLIK. Bul dúnıeniń baıansyz bazary kimniń basynan ótpegen deısiń, aldyńda ne kútip turǵanyn qaıdan bilesiń?

Taǵdyr shirkin artqa baılatyp, kisen salǵyzbasyn dep tileıik...

Zeınep Ahmetova "Kúretamyr"