"QOLYŃDY TÓBEŃE QOIMA"

Aınalasynan zábir-japa kórip, turaqtaıtyn tııanaq taba almaı, janashyr sezimge zar bolǵan adam el-jurtynan bezip ketýge bel býǵanda qolyn tóbesine qoıǵan.

"Endi senderdi jelkemniń shuńqyry kórsin, kóz jetpes jaqqa joǵalam", - dep artyna burylmaı ketedi.

Ol sol ketkennen qaıtyp oralmaıdy. Mundaı aýyr táýekel, tosyn sheshim jasaıtyndar sırek bolsa da el ishinde kezdesken eken. Mysaly, tarıhta bolǵan oqıǵa - Shákárim qajy Qudaıberdiulynyń "Qalqaman-Mamyr" dastanyndaǵy Qalqaman ózin ólimge qıyp, oqqa baılaǵan el-jurtynan osylaısha ketipti, ıaǵnı qolyn tóbesine qoıyp artyna qaramaı jónelipti. Qaıtyp óz eline - Tobyqty ishine qaıtpaǵan.

"Qolyńdy tóbeńe qoıma" degen - tirshilikten túńilý, dúnıeden baz keshý, el-jurtynan, kindik qany tamǵan týǵan jerden aıyrylý sekildi qasiretti jaǵdaı kimniń de bolsa basyna túspesin, jamannan aýlaq bolsyn deıtin tilekten shyqqan tyıym.

Zeınep Ahmetova "Kúretamyr"