QOJA HAFIZ SÓZINEN

Baıaǵyda parsy jurtynda ári bilgish, ári sopy, ári aqyn Hoja Hafız degen kisi bolǵan. Imanyna qazaqtyń talapty jastaryn tanys qylmaq úshin tómengi jyryn qazaq tiline aýdardym.
(Shahkárim)

Kóriniske shoqynǵan,
Sopy bizdi ne bilsin.
Ne dese de syrtymnan,
Renjimeımin, neǵylsyn.
Aq kóńildiń kezine,
Ne kelse de - jaqsylyq.
Týra joldyń tezine,
Túsken kórmes tapshylyq.
Bir jaıaýdy júremin,
Oıyn bolar porym joq.
Bul shatyrashta, bilemin,
Merzimderge oryn joq.
Munsha bıik shyp-shybar,
Netken úıdiń tóbesi?
Eshkim emes habardar,
Jan bilmeıdi, o nesi.
Netken muńsyz, netken kúsh,
Netken bilgish qudaıym?
Sansyz jara - qorqynysh,
"Ah" deýge de joq jaıym.
Esep, teńdik bilmeıdi
Bizdiń taqtyń ıesi.
Qudaı úshin demeıdi
Jalǵyz saǵat, o nesi?
Ol patshaǵa jol ashyq,
Ne suraıdy, ne deıdi.
Daıashy joq, bostandyq,
Eshkim "Ári júr" demeıdi.
Ne jaramsyz minimiz,
Bizdiń boıdan tabylmaq.
Alla bergen tonymyz,
Bolmaı qoımas boıǵa shaq.
Qymyz isher araǵa,
Barar kisi bir bólek.
Ony satqan qalaǵa,
Ózin satqan, ne kerek.
Synyqshynyń qolymen,
Synǵan kóńil jamaǵan.
Alman sopy qylyǵyn,
Ekiushty qyp qalaǵan.
Bosaǵada otyrsam,
Ar-namysym kóptigi.
Qymyzshyǵa emes sham,
Mal, mansaptyń joqtyǵy.
* * *
Kel, aıaqshy, qymyz quı,
Kópke ber de, maǵan ber.
Mahabbat saldy aýyr kúı,
Jan qysylyp, aqty ter.
Jaz tańynyń nur jeli,
Jar kekilin shaıqaltyp.
Kóńilge tolyp qan seli,
Júrekti tur shaıqaltyp.
Jardyń qonaq úıinde
Tynyshtyq qaıda, tyń qaıda?
Qońyraýlatyp kún, túnde,
Dep tur: "Áıda, júk baıla!"
Qarańǵy tolqyn, qandy ushqyn,
Qorqynysh qatty, júk aýyr.
Bizdiń jaıdy ne bilsin,
Jaǵada júksiz jat baýyr.
Paıda, maqtan, aıla, kúsh
Jaman atqa ushyratty.
Saýyq, dýman, kórneý is
Jasyryn qashan tek jatty?
"Jaınamazdy araqpen
Boıa", - dese muǵan pir,
Taza júrek jol bilgen,
Bolsa aıtqanyn iste, júr!
Rahat, suhbat izdeseń,
Aq jolyńnan aırylma.
Aq júrekke kez kelseń,
Ózge túkke qaırylma.

Bul parsy jurtynyń baıaǵy ótken ataqty bilgish aqyny Hoja Hafız sózinen qazaq tiline aýdarylǵan. Osy kúngi alash urandy halyqtyń hám basshylarynyń basyna kelip turǵan aýyrtpalyqqa dál keletuǵyn sóz bolǵan soń nasıhat bolar dep jazdym. Oqýshylar, esterińde bolsyn: Hoja Hafızdiń "araq" dep jazǵanyn men kóbinese "qymyz" dep jazamyn. Onyń "araq" ("qymyz")
degeni - aqyl, ǵylym, Haqıhatta "jar" - dos degeni, Alla taǵala hám tabıǵattyń kórkemdigi. Mysaly: "Jaz tańynyń nur jeli" degen jyrynyń maǵynasy - bostandyq kelerde adamdardyń ártúrli partııa tolqyny tabıǵat turmysyn shaıqaltyp, bizdi qatty
qaıǵyǵa salyp turady degenge keledi.

ShÁKÁRIM