Qudaıdan suraǵannyń eki búıiri shyǵady

Bir ataqty musylman ǵalymynyń basynan ótken myna oqıǵa óte áserli dep oılaımyn. Ony ǵalymnyń óz aýzymen baıandaıyq.

«Bir joly jolym túsip Mysyrǵa bardym. Saparym aıaqtalǵan soń Aleksandrııadan shyǵyp Kaır arqyly ushatyn boldym. Reısim tańerteń erte bolǵan soń, Kaırdegi aEroport janyndaǵy meshit ımamyna dostarym arqyly telefon soqqyzyp, tún ortasynda baryp meshitte túnep, tań namazyn oqyǵan soń ushaqqa minetinimdi aıttym. Sondyqtan, meshitti qulyptamaı, ashyq qaldyrýyn ótindim.

Tún ortasynda meshitke kelsem,bir adam mıhrabta sájdede jatyp, ǵammııasha (dıalektide): «Holos ıá Rob! Halılnı... (Boldy jaratýshy Iem! Járdem etshi maǵan...)», - dep jylap, shynaıy duǵa jasap jatqanyn estip, turyp qaldym. Namazyn bitirgen soń, janyna baryp amandasyp, qal-jaǵdaıyn suradym. Ol: «Allaǵa qaı jaǵdaıda shúkir etemin. Biraq erteń áıelime ota jasaıdy. On bes myń tórt júz gıneı kerek», – dedi. Men oǵan qolymda berer eshnárse bolmaǵanymnan qysylyp: «Alla járdem etsin», – dep shyǵaryp saldym.

Útir namazymdy oqyp, uıyqtap qaldym. Tań namazy ýaqytynda azanshy kelip azan aıtty. Namazǵa turǵanymda, meshit ımamy meni tanyp, jolaýshymyn desem de namazǵa ótýimdi ótindi.

Namazdan soń jamaǵat kelip amandasyp jatyr. Ishinde bir adam: «Sheıh, men Sizdi Ekrannan ǵana kórýshi edim, kelgenińiz qandaı jaqsy boldy. Osy meshittiń ústińgi qabatyndaǵy úıde turamyn. Bir ótinishim bar aıtatyn. Osy qalada úlken plastık zaýytym bar, bir jyl tolyp zeketimdi bereıin degeli bir apta boldy. Áıelim: «Otaǵasy, zeketińizdi ustap turmaı, tezirek berińiz», – dep aıtady. Men oǵan: «Men ony eń qınalǵan janǵa bersem, Qııamette Rabbym sol arqyly meni qıynshylyqtan qutqarsa eken...» – deımin. Zeketim on bes myń tórt júz gıneı boldy. Kimge bergenim durys bolady?» – degende, men jylap jiberdim. Jamaǵat: «Sheıh! Sizge ne boldy?!» – dep tań-tamasha.

Men: «Alla tilegińizdi qabyl etipti. Týra osy – 15 400 gıneı qarjyǵa muqtaj adam ortalaryńyzda tur. Áıeline ota jasatýǵa bir tıyny joq. Eń qınalyp turǵan jan osy», – dep álgi kisini kórsettim.

Zeket berýshi adam osy úıdiń tómengi qabatynda turatyn muqtaj adamdy tanyp, qushaqtap alyp: «Alla ulyq! Baýyrym osy qarjyny áıelińe ota jasaýǵa jumsa», – dedi.

Tosyn syıdy alǵan álgi adam kózi jasqa tolyp, qubylaǵa qarap: «Shúkir etemin Saǵan! Men baqyttymyn!» – dep tilegende, jamaǵat bolyp bárimiz jyladyq. Men olarǵa: «Olar tún ishinde tósekterin tárk etip, bir jaǵynan (Allanyń) qaharynan qorqyp, ekinshi jaǵynan sheksiz meıiriminen úmit etken kúıde Rabbylaryna jalynyp-jalbarynyp duǵa etedi. Sondaı-aq, ózderine rızyq-nesibe retinde bergen nyǵmetterimizdiń bir parasyn izgilik jolynda jumsaıdy. Dúnıede istegen ıgi isteri úshin olardy (aqırette) kózaıym etip, shattyqqa bóleıtin qandaı qupııa syı-syıapattyń, nendeı tosyn nyǵmetterdiń saqtaýly (jasyrýly) ekenin jan balasy bilmeıdi»[1], – degen degen aıattardy oqyp, mánisi osy oqıǵadaǵydaı ekenin aıtyp berdim», – dep sózin aıaqtaǵan eken.

Rasynda, atam qazaq «Qudaıdan suraǵannyń eki búıiri shyǵady» dep aıtqandaı, shynaıy tilesek, Allanyń qazynasy keń ekenin umytpaýymyz kerek.

Qýat Qabdolda