RAMAZAN AIYNYŃ SOŃǴY 10 KÚNINDE
Orazanyń sońǵy 10 kúnin qalaı ótkizgen durys? Bul 10 kún – ózińizge esep berýge jáne bolashaǵyńyzǵa jospar qurýǵa múmkindik beredi.
Kóp jaqsylyq jasaý jáne sadaqa berý
Orazanyń sońǵy on kúninde jomarttyq tanytý óte mańyzdy. Bul – ramazan aıynyń mańyzdy súnneti, sebebi, Paıǵambarymyz (oǵan Allanyń salaýaty men sálemi bolsyn) osy ýaqytta erekshe jomartyq tanytqany belgili. Imam án-Naýaýı: «Ramazan aıynda jomarttyq tanytý qajet, ásirese, sońǵy on kúni. Osylaısha biz Alla elshisIniń súnnetin oryndaǵan bolamyz. Sonymen qatar, qasıetti aıda jasalǵan amaldardyń saýaby eselenip jazylady. Bul aıda kópshilik qulshylyqqa kóp mán berip jatqan kezde keıbir muqtaj jandarǵa kómek qajet bolýy múmkin» degen.
Qulshylyqty arttyrý
Ramazan aıynyń aıaǵynda kópshiligimiz sharshańqyrap qalamyz. Bálkim, bul álsizdikke sebep bolǵan rejımniń buzylýy men ashtyq sezimderi bolar. Qalaı bolǵanda da, bizdiń yqylasymyz álsireıdi, biraq oǵan jol berýge bolmaıdy.
Ysyrap jasaýdan bas tartý
Aıt kúnine eki-úsh kún qalǵanda, tipti bir apta qalǵanda azyq-túlik tizimin jasaýdy bastaımyz. Bul jaqsy. Degenmen, eń bastysy aspazdyq shabytymyz sheginen shyǵyp ketpeýin qadaǵalaǵan jón.
Keshirim suraý
Endi jan dúnıemiz jaıly sóz qozǵaıyq. Ramazan boıy keshirim suraýymyz kerek, týystarmen qarym-qatynasty jaqsartý kerek, otbasylyq ómirime jylýlyqty qaıtarýym kerek dep oılap júrgen bolarsyz. Qasıetti aıdyń sońǵy on kúni osy oılardyń júzege asýyna taptyrmaıtyn sát. Ata-anańyzdan, joldasyńyzdan, aǵa-baýyr, tanystaryńyzdan, Jaratýshydan keshirim surańyz. Ózińiz de sizdi ashyq ári jasyryn túrde renjitken jandar bolsa, keshirińiz. Aǵaıyn-týyspen jıi habarlasyńyz jáne kórshilerge jyly qabaq tanytyńyz.
Maqsattardy júzege asyrý
Ramazan aıynyń basynda aldyńyzǵa maqsat qoıǵanyńyz belgili: Quran oqýdy bastaý, nápil namazdar oqý, ýádege berik bolý, kúnde ata-anańyzǵa habarlasý jáne t.b. Eger Ramazan aıynda maqsatyńyzǵa jetýdiń qadamyn jasamaǵan bolsańyz, qasıetti aıdyń bereketi bizdi tastap ketpeı turyp, sońǵy on kúninde bastańyz.
Duǵa etý
Aısha anamyz Paıǵambarymyzdan (oǵan Allanyń salaýaty men sálemi bolsyn): «Ýa, Allanyń elshisi! Eger men Qadir túniniń bastalǵany týraly bilsem ne aıtýym kerek?» – dep suraıdy. Sonda Paıǵambar: «Ýa, Alla! Rasynda, Sen – Keshirimdisiń, keshirýdi jaqsy kóresiń. Meni keshire gór!» – dep aıt dep úıretedi. Oqylýy: «Allahýmmá ınnáká afýýn, týhıbbýl-afýa fafý-annı».
Qadir túni men oraza aıt merekelerine daıyndalý
Osy on kún ishinde bolatyn Qadir túni men oraza aıt merekelerine yqylas qoıyp daıyndalyńyz. Munda aıt kúni toıyp as jeýdi emes, orazany aman-esen tolyǵymen ótep shyǵýǵa, mol saýapqa kenelýge duǵa etińiz.
