Ramazan ekinshi onkúndigi: Allanyń keshirimi eselenedi
Ramazan aıynyń on kúni de artta qaldy. Allanyń raqymymen Ramazan aıynyń alǵashqy on kúni de aıaqtalyp, on birinshi kúnine aıaq basyp otyrmyz. Áz paıǵambar óziniń bir hadısinde Ramazan aıynyń úsh bólikten turatynyn, onyń birinshisi – Allanyń meıirimi bolsa, ekinshi bóligi – Allanyń keshirimi, sońǵysy – tozaqtan qutylý ekendigin aıtqan.
Bul hadıs kópshilikke málim bolǵanymen, biz neni baıqaımyz? Ádettegideı, Ramazan aıy kelgende bizdiń qýanyshymyzda shek bolmaı, ony saǵyna qarsy alamyz, alaıda ortasyna kelgende ol shabyt basylyp, qulshynysymyz da báseńsip qalǵanyn ańǵaramyz. Deı turǵanmen, Qadir túni kezinde qaıta jandanyp, qımastyqpen qosh aıtysamyz.
Bul jaıt kópshilikke tanys, degenmen sońǵy kúnderi qımastyqpen qosh aıtysyp qalýdyń berer paıdasy shamaly. Ramazan aıynyń árbir mınýty úlken mańyzǵa ıe bolýy tıis, sebebi adam balasynyń saýapqa kenelýi úshin, keshirimge ıe bolýy úshin, duǵasynyń qabyl bolýy úshin nebir múmkinshilikterdiń esigi ashylady.
Ramazan aıynyń ortasy – Allanyń keshirimine ıe bolýǵa eń sátti kezeń. Bul kezde Alla Taǵala Óziniń keshirimin eseleı túsedi. Aıdyń ortasy bolǵanda ár túni, ár kúni myńdaǵan quldaryn tozaq otynan azat etip, jánnatpen súıinshileıdi.
Bul aıdaǵy kez kelgen qulshylyq adam balasyna oı salyp, ózin-ózi esepke alyp, táýbe etýine kóp kómek beredi. Táýbe men keshirimge qulshylyq arqyly ǵana qol jetkize alamyz. Iman keltirgen jan úshin qulshylyqtyń qaı túri bolsa da esh qıyndyq týdyrmaıdy. Yqylasty jan qashanda jasaǵan qatelikteri men kúnálaryna ókinip, barynsha kóp qulshylyq jasap qalýǵa tyrysady.
Ramazan aıynyń ortasy bolǵanda alǵashqy kezdegi yqylas pen jalyndy jańartyp, bul kúnderi de ýaqytymyzdy tıimdi paıdalanýǵa tyrysý kerek.
Alla Taǵala qasıetti Quranda: «Men olardyń táýbesin qabyl alyp, kúnálaryn keshiremin. Men táýbelerdi qabyl etýshi hám erekshe meıirimdimin»,- deıdi. («Baqara» súresi, 160-aıat)
Kúlli álemniń Rabbysy, Esep kúniniń Iesi bolǵan Alla Taǵalanyń ýádesi osy. Árqaısymyzdyń qate-kemshiligimiz bar, bireýdi renjitsek, áldekimniń janyna jara saldyq, qolymyzda bola tura járdem bermedik, keı kezde ótirik aıta saldyq, osyndaı kúná-kemshilikterdi tizbektep sanar bolsaq, sanyna jetpesimiz anyq. Bul kúnálardyń qaıyry joq, olar bizdiń ımanymyzǵa syn, arymyzdy aýyr júk bolyp basyp tur. Olar bizdi taza ári pák kóńil men amaldardan tosýda. Deı turǵanmen, Rabbymyz erekshe meıirimdi. Bul kúnderi Jaratýshymyz árbir kúnámizdi keshedi.
Kez kelgen jumyr bas pende Ramazan aıynda Rabbysyna táýbesin keltirip, talmaı duǵasyn jasar bolsa, mindetti túrde Onyń keshirimine qol jetkizedi.
Alla Taǵala barshamyzdy qasıetti aıdyń qadirin bilgen, Jaratýshynyń raqymyna ıe bolǵan jandardan etsin!
