SABYR

Dinimizde sabyrlylyqqa qatty mán beriledi. Atalarymyz "Asyqqan shaıtannyń isi" degende de sol sabyrlylyqty qaperge alý qajettiligin eskertedi. Másele tek asyǵýda emes. Budan biz sabyrdyń shaıtanǵa qarsy qoıylatyn musylman quraly ekendigin túısinemiz. Demek biz sabyr saqtaı almaǵan kezdiń bárinde shaıtan jeteginde ketemiz.

Sonymen "asyǵýdyń" - shaıtannan, al "sabyrdyń" - Alladan ekenin bildik. Uǵynyqtylyq úshin sabyrdy - aq tús, al asyǵýdy - qara tús dep qabyldaıyq. Sonymen ol ekeýi de bizge áser etedi. Biz shaıtan jeteginde ketken kezimizdi shartty túrde "asyǵý" dep atadyq. Jáne ol ekeýi de bizge áser etedi dedik. Áser etkende olar bizdi, ımanymyzdy deıik, óz túsine "boıaı" bastaıdy. Axırette perishteler adamdy osy "boıaý" arqyly suryptaıdy. Sony bilgen bizdiń atalarymyz "Sabyr túbi - sary altyn, sarǵaıǵan jeter - muratqa" degen danyshpandyqty urpaǵyna mıras etip qaldyrǵan. Mán bersek, biz sabyr saqtaı alý nátıjesinde ózimiz "boıalǵan" tústi sap altynǵa (kámil ınsan) aınaldyramyz. Soǵan tutastaı "boıalǵan" kezde (sarǵaıǵan kezde) muratqa, ıaǵnı Alla álemine jetemiz. Dinı tilde ol "jetý" - mıǵraj dep atalady. Soǵan oraı "Namaz - múmınniń mıǵrajy" delinedi. Biraq namaz oqyǵannyń bári mıǵraj jasaı almaıdy. Sebebi... Durys. Ol muratqa tek sarǵaıǵandar ǵana jetedi. Sondyqtan da xadıs shárıfte: "Bálege sabyr etkenge - 300, ǵıbadat etýge sabyr etkenge - 600, kúná istemeýge sabyr etkenge - 900 dáreje ıxsan etiledi" delinedi. Sebebi, adamnyń basyna qıynshylyq kelýi, aýrýǵa shaldyǵýy sııaqty keleńsizdikter ol adam úshin qaıyrly bolýy múmkin. Jalpy basqa túsken bále men qıynshylyqtar, qaıǵy-qasiret, aýrý, tipti aıaqqa kirgen tikenge deıin, xadıste aıtylatynyndaı, kúnálardyń keshirilýine sebep bolady. Al ǵıbadat etýge sabyr etip shydaý bálege sabyr etýden qıyn bolǵandyqtan saýaby da kóbirek bolady. Máselen bir aı oraza ustaý úshin de kóp adam sabyrlylyq saqtaı almaıdy. Sol sııaqty, tańerteń erte turyp, dáret alý, kúnine bes ret namaz oqý da tózimdilik pen sabyrdy qajet etedi. Al kúná isterge barmaı sabyrlylyq saqtaý, ǵıbadattan joǵary turady.

Iá, biz teketiresti, qaıshylyqty ómir keshemiz. Alaıda biz onyń materıaldyq jaǵyna ǵana mán beremiz de, rýxanııatyn qaperge ala bermeımiz. Bolmasa ol bizdi óz túsine "boıaýmen" keledi. Olardyń qandaı tús ekenin joǵaryda aıttyq. Sondyqtan kimniń de bolsyn "sarǵaıǵany" lázim. Atalarymyz aıtpaqshy, biz sonda ǵana muratqa jetemiz.

Qudııar BILÁL