SABYR – ADAMNYŃ DOSY
SABYR – qashannan adamnyń dosy. Sondyqtan da atam qazaq «ashýyńdy sabyryńa jeńdir» dep beker aıtpasa kerek.
Sabyrdyń adamǵa tek jeńis syılaıtyny jaıynda sonaý paıǵambar zamanynan bizge jetken hadıster de aıtqan. Adamzatqa úlgi bolǵan Muhammed (s.ǵ.s.) paıǵambarymyz: «Ashýǵa erik berme. Ashý qysyp, býlyǵyp turǵan adamnyń kózine kúlip qara. Kúlimsiregen kózge eshkim de jamandyq jasaı almaıdy» dep ósıet etken eken.
Sabyr adam balasyn jaqsylyqqa jeteleıtin, adamdyq jeńiske umtyldyratyn adamı dara qasıet. Tarıhqa kóz júgirtsek, el bılegen kez kelgen basshynyń utqany da osy sabyrǵa beriktiginen. Al sabyrsyzdyqtan utylǵany qanshama?
Kezinde aqyldyń kúshi, naızanyń ushymen álemdi jaýlaýdy maqsat tutqan Shyńǵyshan da qandaı qıyn sát bolsyn sabyryn joǵaltpaǵan. Ashýy alqymyna kelgen tusta, artqa ustaǵan qoldarynyń on saýsaǵyn sanap jáne sol saýsaqtaryn óz qalaýynsha atap, sabyr shaqyrǵan kórinedi... Osylaı ózin tejeýiniń, sabyrly bolýynyń arqasynda myńdaǵan áskerge qolbasshy bolyp, qanshama eldi jaýlap, dittegen maqsattaryna qol jetkizdi. Bul da bir tarıhtan alatyn urpaqqa ulaǵatty tálim, ónege.
