ShYNAIY TÁÝBA

Paıǵambarymyzǵa (s.ǵ.ý.) qyzmet etetin,  ansarlardan bolǵan  Sálábá bın Abdýrrahman degen bir jas jigit bar edi. Bir kúni Paıǵambarymyz (s.ǵ.s.) ony bir qajettiligi úshin bir jerge jiberedi. Sálábá (r.a.) jol boıyndaǵy bir úıdiń janynan ótip bara jatyp ishinen  yńǵaısyz bir halde otyrǵan áıeldi kórip qalady jáne oǵan birneshe ret qaraıdy. Biraq sol sátte qatty ókinip, Alla Elshisine (s.ǵ.ý.) osy jaǵdaı týraly ýahı túsedi dep qorqyp, artyna qaramaı qashyp ketedi. Mekke men Mádına arasyndaǵy taýǵa baryp, sonda jasyrynyp qalady.

Solaısha Paıǵambarymyz (s.ǵ.ý.) ony qyryq kúndeı kóre almaıdy. Sonda Jábireıil (a.s.) kelip: «Ýa, Muhammed! Rabbyń Ázza ýá Jállá saǵan sálem aıtty: «Úmmettińnen bireý taýǵa tyǵylyp, tozaq otynan menen pana suraıdy» - deıdi. Sonda Paıǵambarymyz (s.ǵ.ý.) Omar men Salmany Farısıge (r. anhýma) baryp, Sálábáni alyp kelýdi tapsyrady.

Olar jolǵa shyǵyp, ony Mádına mýnáýýáranyń ótkelderiniń birinen kózinen jas aǵyp, táýbe etip otyrǵan jerinen tabady. Sálábá (r.a.) Omardan (r.a.) «Allanyń elshisi (s.ǵ.s.) meniń kúnálarymdy bile me?»- dep suraıdy. Omar (r.a.): «Ol jaǵyn anyq bilmeımin, biraq keshe Alla Elshisi (s.ǵ.s.) seni esine alyp, jylap jiberdi. Ol meni men Salmandy seni taýyp kel jiberdi» – deıdi. Sálábá: «Olaı bolsa, Eı, Omar, meni Rasýlallanyń quzyryna Bilál qamat oqyp, namazǵa turaıyn dep jatqan kezde shyǵar" - deıdi. 

Omar (r.a.) onyń bul usynysyn  qabyldap, ony Mádınaǵa alyp keledi. Olar kelgende Paıǵambarymyz (s.ǵ.ý.) tań namazyn oqyp jatyr eken. Omar men Salman  (r. anhýma) birden sapqa turyp, birge namazdaryn qylady. Sálábá (r.a.) Paıǵambardyń (s.ǵ.ý.) múbárák daýysyn estigende esinen tanyp, qulap qalady.

Paıǵambarymyz (s.ǵ.ý.) namazdan keıin sálem berip, Sálábáni janyna shaqyrady. Sálábá (r.a): «Ýa, Allanyń elshisi, seni tyńdap turmyn!» – deıdi. Paıǵambarymyz (s.ǵ.ý.) Sálábáǵa qarap: «Seniń ketip qalýyńnyń sebebi ne?» dep suraıdy.  Ol: «Ketýimniń sebebi - meniń kúnám, ýa, Allanyń elshisi!» – deıdi. 

Paıǵambarymyz (s.a.ý.) Sálábáǵa: «Saǵan kúnálaryń men qatelikterińe káffárat bolatyn bir aıattan habar bereıin be? «Rabbanáá áátına fıd-dýnıa hasanátán ýá fıl-ahıratı hasanátán ýá qına ǵazabán-náár» ("Allahym, bizge dúnıe de jaqsylyq ber, aqyrette de jaqsylyq ber jáne bizdi tozaq azabynan saqtaı gór" «Baqara» súresi,201-aıat) dep duǵa qylarsyń! -deıdi.

Sonda Sálábá (r.a.): «Meniń kúnám óte úlken, ýa, Allanyń elshisi!» - degende, Paıǵambarymyz (s.ǵ.s): «Kerisinshe, Alla taǵalanyń sózi bolǵan osy duǵamen Alladan keshirim suraýyńnyń beretin saýaby seniń kemshiligińterińnen de artyq» – deıdi.  Osylaısha Paıǵambarymyz (s.ǵ.s) oǵan úıine qaıtýyn buıyrady.

Sálábá (r.a.) úıine barǵan soń aýyryp, segiz kúndeı úıinde bolady. Paıǵambarymyz (s.a.ý.) Salmanmen (r.a.) Sálábáǵa barady. Paıǵambarymyz (s.a.ý.) otyryp, Sálábániń basyn múbárák tizesine qoıady, biraq Sálábá (r.a.) birden basyn tartyp alady. Alla Elshisi (s.a.ý.): «Eı, Sálábá, tizemnen basyńdy nege aldyń?» – dep suraıdy. Ol: «Meniń basym kúnáǵa toly, ýa, Rasýlallah» - deıdi. Sodan keıin «Sen ne sezinesiń?» - dep suraýyna: «Súıekterim men terimniń arasynda qumyrsqalar júrip bara jatqandaı sezinemin» - dep jaýap beredi.  «Qandaı qalaýyń bar?» - dep suraǵanda Sálábá (r.a.): «Rabbymnyń meni keshirgenin qalaımyn» - deıdi. Osy kezde Jábireıil (a.s.) kelip:

«Azza ýá Jállá bolǵan Uly Rabbyń saǵan sálem aıtty jáne: «Eger meniń myna qulym búkil dúnıeniń kólemindeı kúnámen kelse de, men ony dúnıe kólemindeı  keshirimimmen qarsy alamyn» – deıdi. Paıǵambarymyz (s.a.ý.) Sálábáǵa (r.a.) bul habar jetkizgende, ol sol sátte jan tapsyrady.

Alla Elshisi (s.a.ý.) onyń denesin jýýdy buıyrady jáne ony óz qolymen kebindep, ózi janaza namazyn oqıdy. Osy kezde Alla Elshisi (s.a.ý.) aıaǵynyń ushymen júrip kele jatty.  Sahabalar sebebin suraǵanda, ol: «Meni haq paıǵambar etip jibergen Allaǵa ant etemin, janazaǵa qatysýǵa kelgen perishtelerdiń  kóptiginen, aıaǵymdy qoıarǵa jer taba almaı kele jatyrmyn» – dep jaýap beredi.