Shəkerim QUDAIBERDIULY: DIN

Jer júzine qarasam,

Neshe túrli halyq bar.

Din, ımanyn, sanasam,

Myńnan artyq,anyq bar.

Bul qalaı dep oılasam,

Munyń da bir syry bar.

Tereń oıǵa boılasam‚

Dál mynadaı túri bar:

Jardyń shashy sansyz kóp‚

Ol sanaýǵa kelmeı tur.

Anyq nury osy dep,

Árkim bir tal ustap júr.

Bireý otqa jaǵyndy,

Nurdyń túbi Qudaı dep.

Ne sýretke tabyndy,

Olaı emes‚ bylaı dep.

Biri: «Qudaı bir dese》

Biri aıtady: «Kóp Qudaı».

Biri: «Táńiri – kún» dese‚

Biri deıdi: «Joq Qudaı».

Mine‚ osydan baıqaldy –

Bári izdep júr ıesin.

Tabamyz dep oıǵa aldy‚

Jaratqannyń kıesin.

Jas qozydaı bolyp tur‚

Bilsek, munyń mysaly.

Qoltyq, shabyn túrtip júr‚

Anyq soǵan uqsady.

Oıdy kimnen alǵanyn,

Adam ózi sezbeıdi.

Jannyń aıdap salǵanyn,

Sezbese de izdeıdi.

Haqıqattyń taraýy,

Túgel jetpeı qalmaıdy.

Ártúrli bop qaraýy,

Kóbi anyqtaı almaıdy.

Jerdiń júzin dál taýyp‚

Eshbir din joq ornyqqan.

Bárinde de bar qaýip‚

Din kóbeıdi sondyqtan.

Sol kóp dinde sheshý bar‚

Ol sheshýdiń arty bar.

Adasqanǵa keshý bar‚

Keshýdiń de sharty bar.

Meıli,kimge shoqynsyn,

Shyn izdese təńirisin.

Qııanatty jaý bilsin,

Onan tyıyp nəpsisin.

Təńiri joly - aq júrek,

Saıtan degen - qııanat.

Aq júrekti erterek,

Eskerdaǵy qyl ədet.

Úsh nársege haqıqat,

Nansań, ıman, tipti, ońaı.

Kúná degen – qııanat,

Jan joǵalmas, bar Qudaı.

Osy úsheýin aqylmen,

Ábden synap nana alsań,

Aq jolyna qoıdyń den,

Anyq uǵyp qana alsań.