SÚNNETPEN AMAL ETÝ

Imam Rabbanı (q.s.) bir hatynda bylaı deıdi:

Alla taǵala bizge Paıǵambarymyz Muhammed Mustafanyń (s.a.ý.) súnnetine erip, júzimizdi jarqyratsyn. Sol súnnet ıesine salaýat pen sálem bolsyn...

Rasynda Allanyń Rasýly Muhammed (s.a.ý.) kúlli álemniń Rabby Allanyń habıbi (súıiktisi). Sol sebepti Alla taǵala Qalam súresiniń 4-aıatynda: «Shúbásiz, sen teńdesi joq uly kórkem minez-qulyqqa ıesiń» - degen. Iasın súresiniń 3-4-shi aıattarynda: «Sen, álbette, (aqıqatty jar salý mindetimen jiberilgen) elshi paıǵambardyń biri hám biregeıisiń! Sen tup-týra joldasyń», - dep buıyrǵan. Ánǵam súresiniń 153-aıatynda: «Meniń týra jolym, mine, osy. Endeshe, meniń jolymmen júrińder. Ózge soqpaq-súrleýlerge túsip ketpeńder...» - delingen.

Bul aıatta Alla taǵala Paıǵambarymyzdyń (s.a.ý.) sharıǵatyn «syrat mustaqım», ıaǵnı týra jol dep ataǵan. Sharıǵatqa saı kelmeıtin, Islam dinine jat basqa joldarmen júrýge tyıym salǵan. Paıǵambarymyz (s.a.ý.) shúkirligin pash etý, adamdardy habardar etý jáne olardy týra jolǵa baǵyttaý úshin bylaı dep aıtqan: «Eń týra jol – Muhammedtiń joly». Sonymen qatar, Paıǵambarymyz (s.a.ý.): «Meni Rabbym tárbıeledi, ádebimdi de eń kórkem etti», – deıdi.

«Batın» (ıaǵnı, tarıqat pen aqıqat) «zahırdy» (ıaǵnı sharıǵatty) kemeline keltirip, tolyqtaıdy. Zahır men batın arasynda tıtteı de aıyrmashylyq joq. Mysaly, ótirik aıtpaý sharıǵat, al ótirik aıtýdy, tipti, oılamaý, bul - tarıqat pen aqıqat. Ótirikti oılamaý úshin kúsh salyp, talpynsa ol - tarıqat, al munysy kúsh jumsamaı júzege assa, ol - aqıqat. Qysqasy, batın, ıaǵnı tarıqat pen aqıqat zahırdi, ıaǵnı sharıǵatty tolyqtyrý ári kemeline jetkizý qyzmetin atqarady. (Máktýbat Imam Rabbanı, 1-tom, 41-hat).