SIýTsAI JÚIESINIŃ ShARIǴI ÚKIMI

Sıýtsaı – radja-ıoga fılosofııasyna negizdelgen nýmerologııanyń bir túri. Bul júıeniń seniminde adam ómirindegi belgili sandar (týǵan kúni, neke qıǵan kezi t.b.) bir planeta Energııasymen tyǵyz baılanysta bolady. Sandarda adamnyń minezi, qabileti, ómirge kelgen maqsaty, bolashaqta oryn alatyn oqıǵalary qamtylǵan. Eger sandar Energııaǵa sáıkes kelse, ómiri jaqsy, al sáıkes kelmese, keleńsiz jaǵdaılar oryn alýy múmkin. Sıýtsaı adamdardyń taǵdyryn ózgertedi dep senedi[1].

Bul júıemen shuǵyldaný sharıǵatymyzǵa qaıshy. Sebebi:

1. Adamnyń taǵdyryn sandarǵa baılap, onyń jaǵymdy nemese keri áseri bar dep sendirý.

Mundaı nanymnyń nátıjesinde adamnyń Allaǵa emes, sandarǵa senimi artady. Dinimizde mundaı sandar boljamyna senip, Allanyń qudiretine, taǵdyryna shák keltirý – úlken kúná. Islam senimi boıynsha álemdegi barlyq qubylystar, ózgerister Alla Taǵalanyń qalaýymen ǵana júzege asady[2]. Sonymen qatar, taǵdyrdy, bolashaqty Alladan basqa eshkim bilmeıdi. Alla Taǵala qasıetti Quranda: 

قُلْ لا أَمْلِكُ لِنَفْسِي نَفْعًا وَلا ضَرًّا إِلا مَا شَاءَ اللَّهُ وَلَوْ كُنْتُ أَعْلَمُ الْغَيْبَ لاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ إِنْ أَنَا إِلا نَذِيرٌ وَبَشِيرٌ لِقَوْمٍ يُؤْمِنُونَ

«(Ýa, Muhammed) olarǵa: «Men Alla qalamaıynsha, óz-ózime tıtteı de paıda keltire almaımyn, sondaı-aq ózime keletin zııannyń da betin qaıtara almaımyn. Eger ǵaıypty (bolashaqty) biletin bolsam (esh ýaqytta shyǵynǵa ushyrmaı) árdaıym mol tabysqa kenelip otyrar edim hám (aldaǵy qaýip-qaterden aldyn-ala saqtanar edim) basyma eshqandaı jamandyq ta, bále-jala da kelmes edi. Men bar bolǵany ıman keltiretin qaýymǵa eskertýshi ári súıinshileýshimin» dep aıt»[3], – degen.

Paıǵambarymyz (oǵan Allanyń salaýaty men sálemi bolsyn) ǵaıyptyń kilti beseý dep, onyń biri retinde erteńgi kúni ne bolatynyn bir Alladan basqa eshkim bilmeıtinin atap ótken[4].  

Ibn Haldýn: «Sandar men áripter arqyly boljam jasaý ǵylymı ádiske negizdelmeıdi. Olardiki jaı boljam men sezim ǵana», – degen[5]. 

2. Sıýtsaı – pal ashýdyń bir túri.

Sharıǵatymyzda pal ashtyrý jáne juldyznamaǵa sený – haram. Ardaqty Paıǵambarymyz Muhammed (oǵan Allanyń salaýaty men sálemi bolsyn):

من أتى عرَّافًا أو كاهنًا فصدَّقَهُ بما يقولُ فقد كفرَ بما أنزلَ على محمَّدٍ

«Kimde-kim balgerge, sıqyrshyǵa, ne sáýegeıge baryp bir nárse surap, onyń aıtqandaryn rastasa, onda ol Muhammedke túsken nársege kúpirlik etken bolady»[6], – degen.

Ábý Jaǵfar ál-Ýarraq at-Tahaýı óziniń «Aqıdatý at-Tahaýııa» atty kitabynda áhli sýnnanyń senimin baıandap, bylaı deıdi: «Biz eshqandaı sáýegeıdi, kóripkeldi jáne Quran men súnnetke, sondaı-aq úmbettiń biraýyzdy pikirine qaıshy keletin nárseni aıtqandardy rastamaımyz»[7].

Imam Záhabı: «Bul dúnıeniń jáne onyń turǵyndary men taýlary joq bolatyny týraly úzildi-kesildi dálelder kelgen. Ony eshkim joqqa shyǵara almaıdy. Onyń qashan bolatyny bir Alla ǵana aıan. Kim ony arıfmetıkalyq eseppen, nýmerologııamen, pal ashý jáne osyǵan uqsas istermen bilemin dese ol – adasýshylyq»[8], – deıdi.

Osy jáne ózge de sebepterge baılanysty sıýtsaı júıesine nemese soǵan uqsas basqa da tylsym kúshtermen aınalysýǵa, olarǵa júginýge sharıǵatymyzda qatań tyıym salynady.

 

ÚKIM:

1. Sıýtsaı júıesinde sandar boljamyna senip, Allanyń qudiretine shák keltirý jáne adamnyń taǵdyryn boljaý – haram.
2. Musylman adam taǵdyrǵa ıman keltirip, jaqsylyq pen jamandyqty bir Alladan dep senip, bolashaqty boljaıtyn túrli nanym-senimderden aýlaq bolýy tıis.

 

QMDB Ǵulamalar keńesi

 

[1] https://www.wday.ru/stil-zhizny/motivatsiya/nauka-syucai-kak-uznat-vse-o-svoem-soznanii-i-missii-po-date-rozhdeniya/. https://zhasalash.kz/ruhaniyat/bibigul-tilesqyzy-syucaj-gylymy-filosofiyamen-tikelej-bajlanysty-22197.html. https://www.instagram.com/stories/highlights/17959206127542522/, Gulmirazh_zhanat. https://www.instagram.com/p/CgCOMbgLSp1/

[2] Hıdaıatý ál-mýrıd, 91.

[3] «Aǵraf» súresi, 188-aıat.

[4] Buharı, №7379.

[5] Mýhammad Sálım ál-Hıdr, Jádál ál-mázhab ýá át-tárıh, 44.

[6] Ábý Dáýit, №3904. Termızı, №135. Ibn Májá, №639. Ahmad, 2/408.

[7] Abdýlǵanı ál-Ǵunaımı, Sharhý aqıdatý at-Tahaýııa, 197.

[8] Ál-Mánáýı, Fáıdý ál-qadır sharhý ál-jámıǵ ás-saǵır, 3/732.