Týystarmen qarym-qatynasty úzý – munafyqtyń sıpaty

Quran Kárimde Alla Taǵala bylaı deıdi: «Eı, munafyqtar, eger senderdiń qoldaryńa bılik tıse, elde qyrǵyn shyǵaryp, tártipti buzyp, týysqandarmen qarym-qatynasty aıaq asty etesińder. Mine, bular – Alla Taǵalanyń laǵnetine ushyrap qulaqtary sańyraý, kózderi soqyr bolǵan adamdar»[1].

Aıatta aıtylǵandaı, munafyqtardyń (ekijúzdilerdiń) eń basty ereksheligi – qoldaryna bılik tıgende adamdardy tatýlastyrý, paıdalaryna jaraý emes, kerisinshe qyryp-joıý, búlik shyǵarý. Olar halyqty basqaratyn bolsa, ádilet aıaq astynda taptalyp, zulymdyq  keń etek jaıyp, jábirlenýshiniń muń-zary kóktiń qaqpasyna deıin jetedi. Munafyqtardyń osy erekshelikterimen qatar týystarmen qatynasty úzý, olardyń jaǵdaıynan beıhabar, muń-muqtajdyqtaryna súıeý bolýdyń ornyna at tonyn ala qashý sekildi qasıetteri bar. Olar týysqandardyń arasyn buzyp, urys-keris shyǵaryp turady. Týystardy izdemeý, hal jaǵdaıyn suramaý, olarǵa at izin salmaý – musylmannyń emes, munafyqtyń qasıeti. Biraq týysqandarmen baılanysyn úzgen adamnyń bárin munafyq dep aıtýǵa bolmaıdy. Tek qana munafyqtyq sıpatqa ıe deýge bolady. Sebebi kimniń musylman, kimniń kápir, kimniń munafyq ekenin Alla Taǵaladan basqa eshkim bilmeıdi.

Týysqandyq quqyqtarǵa moıynsuný Alla Taǵalanyń ámiri bolǵandyqtan júreginde ımany bar adam týysqandarymen baılanysty úzbeýi kerek. Olarǵa nemquraıdy qarap, aradaǵy týysqandyqty umytpaýy, olarǵa kesirin tıgizbeýi tıis.

Ákim Alymýddınuly