«JAMANNYŃ KEÝDESI ÚLKEN, SÓZI KESEK...»

Jaqsy jigit el - jurtynyń qalasyndaı,
Jaqsy áıel ámme jurttyń anasyndaı. 
Jaqsyǵa eshkimniń de jattyǵy joq, 
Kóredi bárin de óz balasyndaı. 
Jaqsy jigit sózine saq turady, 
Qyrannyń qyrdan baıqar balasyndaı. 
Jaman parqy jaqsymen birdeı emes, 
Jaqsy jigit eliniń aǵasyndaı. 
Jaqsynyń sózin árkim paıdalanar, 
Mıýaly alma, óriktiń aǵashyndaı. 
Jamannyń kókiregi - kór, kózi - soqyr, 
Júrer joldan tal túste adasyp - aı. 
Jaqsy adam qaı jerden ajyraıdy, 
Jaqsymyn dep bári júr talasyp - aı. 
Jamandar - ótirikshi, ósegi kóp, 
El-jurttyń iritki salar arasyna - aı. 
Jalǵan sózben byqsytar el arasyn, 
Janbaı qalǵan aǵashtyń shalasyndaı. 
Soqtyǵyp árkimge bir urynady, 
Sıyrdyń tentek bolǵan tanasyndaı. 
Sondaı jannyń eshkimge súıkimi joq, 
Jylqynyń qotyr bolǵan alasyndaı. 

Jaqsy adam eldiń basshy serkesindeı, 
Juǵymdy bolar elge erkesindeı. 
Jaqsynyń júzi jyly, sózi maıda, 
Halqymnyń qalyń júndi kórpesindeı. 
Jaqsy bolar balanyń júzi jaqsy, 
Orystyń kúımeı pisken bólkesindeı. 

Jaqsyǵa úlken-kishi bári jaqsy, 
Jasynan birge ósken erkesindeı. 
Jaqsy kisi kóriner jyl qusyndaı, 
Jaman adam baltanyń uńǵysyndaı. 
«Olaqtan salaq jaman» ─ degen maqal, 
Jamandar túzeı almas turmysyn -aı. 
Jaqsy adam alysty jaqyn eter, 

Bettesken eki taýdyń turǵysyndaı. 
Jamandar ósek-aıan aıtyp júrer, 
Eshkimniń bilmese de qylmysyn-aı. 
Jamannyń keýdesi úlken, sózi kesek, 
Aqyly aýysqan adamnyń jyndysynd - aı. 
Ekeýin salystyryp ádeıi aıttym, 
Qajetin qoldanarsyń turmysyńa - aı.

Súıinbaı ARONULY