JAQSY MEKTEP

Ata-anasy balasyna jaqsy muǵalimdi tańdady. Tańerteń atasy nemeresin ertip mektepke ketti. Olar mektep aýlasyna kirgende oqýshylar olardy qorshap aldy.

-Myna shaldyń túrin qarańdar,-dep kúldi bir bala.

-Eı kishkentaı bóshke,-dep, taǵy bireýi túrin tyrjıtty.

Kishkentaı balalar atasy men nemeresiniń janynda aıqaılap, sekirip oınaqtap júr. Osy kezde mektepte qońyraý soǵyldy da oqýshylar sabaqqa asyǵyp ketip qaldy.

Atasy úndemeı nemeresiniń qolynan ustady da mektep aýlasynan kóshege shyǵyp ketti.

-Ýra, sabaqqa barmaıtyn boldym,-dep qýandy bala.

-Barmaǵany nesi! Barasyń, biraq bul mektepke emes, basqasyna barasyń! Baratyn mektebińdi ózim taýyp beremin,-dedi atasy.

Atasy nemeresin úıine alyp baryp, ájesine qaldyryp, ózi jaqsy muǵalim izdep ketti. Qandaı mektep kórse, ózi birinshi sol aýlaǵa kirip, muǵalimniń oqýshylardy úziliske jibergenin kútedi. Keıbir mektepterde oqýshylar qarııaǵa múlde mán bermeı qoıdy, al basqa bir mektepterde ony mazaq qylýmen boldy. Aqsaqal úndemesten teris aınalyp, ol jerden shyǵyp ketip jatty.

Aqyrynda ol bir shaǵyn mekteptiń tar aýlasyna kirip, sharbaqqa súıenip turdy. Qońyraý soǵylyp, balalar topyrlap aýlaǵa shyqty.

-Ata, sizge ne boldy, sý ákelip bereıin be?-degen daýys estildi.

-Ata, aýlada oryndyq bar, otyryp dem alyp alyńyzshy!-dep usyndy bir bala.

-Álde muǵalimdi shaqyryp bereıin be?-dep surady bir bala.

Kóp uzamaı aýlaǵa bir jas muǵalim shyqty, Aqsaqal onymen amandasyp:

-Taptym-aý aqyry, nemerem oqıtyn jaqsy mektepti,-dedi.

-Qatelesesiz, mektebimiz jaqsy emes, ol kishkentaı, óte tar mektep,-dedi.

Qarııa onymen aıtysyp jatpady, muǵalimmen kelisip, ketip qaldy. Keshke úıinde balasynyń anasy, kelini atasynan:

-Ata, siz saýatsyzsyz. Jaqsy muǵalimdi qaıdan taýyp júrsiz?-dep surady.

-Shákirtterine qarap muǵaliminiń qandaı ekenin biledi,-dedi atasy.

 

Avtory: Aleksandra Lopatına

aýdarǵan Júrsin Kárim