JAQSYLYQ PEN JAMANDYQTYŃ QARYMY

«Zılzal» súresiniń 7 jáne 8-shi aıattarynda: «Kim tozańnyń kólemindeı jaqsylyq jasasa, sonyń qarymyn kóredi, al kimde-kim tozańnyń salmaǵyndaı jamandyq istese, ol da sonyń qarymyn kóredi», - delingen.

Bul aıattyń tápsirinde Muhammed bın Kaǵb ál-Qurazı (r.a.) bylaı deıdi:

«Imansyz adam jasaǵan jaqsylyqtarynyń saýabyn dúnıede; otbasynda, mal-múlkinde, bala-shaǵasynda kóredi. Eshbir jaqsylyǵy qalmaǵan soń bul dúnıeden ozyp ketedi. Al (kámil) múmın bolsa, kúnálarynyń jazasyn bul dúnıede ózi, otbasy jáne mal-múlkinde tartady. Allanyń aldynda eshbir kúnási qalmaǵanda o dúnıege attanady.

Sondaı-aq tápsir ǵalymy Ibn Jýzeı (r.a.) bylaı deıdi: "Aıattaǵy kimde-kim tozańdaı jamandyq jasasa, sonyń jazasyn kóredi degen úkim tikeleı kápirlerge qatysty aıtylǵan. Al múmınder myna tómendegi jaǵdaılarda jazasyn alady:

• Kúnálaryna táýbe etpeı ólse,

• Tarazyda kúnálaryn aýyr basatyn jaqsylyǵy bolmasa,

• Bul máselede oǵan shapaǵat etilmese,

• Bádir shaıqasyna qatysqandar sııaqty istegen amaldary úshin keshirim alǵandardan bolmasa,

• Alla taǵala ony meıirimimen keshirmese. Óıtkeni kúnáhar múmınder Alla taǵalanyń erkine qaldyrylǵan. Qalasa azaptaıdy, qalasa keshiredi».

Bul jóninde Paıǵambarymyz (s.a.ý.) bylaı deıdi:

«Qul táýbe etkende, Alla taǵala hafaza perishtelerine onyń kúnálaryn umyttyrady. Sol sııaqty onyń aǵzalaryna da, jer betindegi bul kúnáni biletinderge de umyttyrady. Sóıtip, ol kúnásine Alladan basqa kýágersiz Rabbysynyń quzyryna shyǵady».