Jaqsylyqtar jańbyrdaı jaýatyn tún
Ramazan aıy, onyń ishinde Qadir túni – Allanyń quldaryna jarııalaǵan «jaqsylyqtar maýsymy». Bul maýsymda ár musylman jaqsylyqqa umtylyp, Allaǵa jaqyndaýdy kózdeıdi. Sebebi bul maýsymda jaqsylyq esikteri barynsha ashyq.
Eger kimde-kim osy qasıetti aıdy, osy qasıetti Qadir túninde jaqsylyqqa kenele almasa, osynsha ıgilikke qaı kezde keneledi?! Allaǵa jaqyndaıtyn da, týralyqqa bastaıtyn da ýaqyt osy emes pe?!
Endeshe ár ıisi musylman adamǵa Qadir túni qarsańynda bylaı deımiz:
«Ýa, musylman baýyrlarym! Ramazan bitpeı turyp, Qadir túni ketpeı turyp ózderińdi qurdym men azaptan qutqaryńdar! Salıqaly iste jarysyńdar, Allaǵa bet buryp kúnálaryń úshin táýbeni jańartyńdar! Amaldar sońymen ólshenerin eskerip, Ramazannyń sońyn, Qadir túnin ıgilikpen toltyryńdar! Alla ámirin aqsatpańdar! Tyıymdaryna jýymańdar! Allanyń meıiriminen, jomarttyǵynan, keńshiliginen úmit úzbesten, jamandyqtan saqtanyp, jaqsylyq pen berekeni esh talmastan surańdar! Sebebi, Alla Quranda:
وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ
«(Muhammed Ǵ.S.) eger quldarym, Men týraly senen surasa: «Óte jaqynmyn, qashan Menen tilese, tileýshiniń tilegin qabyl etemin. Endeshe olar da ámirimdi qabyl etsin. Jáne Maǵan sensin. Árıne, týra jol tapqan bolar edi»[1], – degen».
Bul tún – berekeli tún. Bul túnde bir jyl boıyna isteletin amaldar ólshenedi:
إِنَّا أَنزَلْنَاهُ فِي لَيْلَةٍ مُّبَارَكَةٍ ۚ إِنَّا كُنَّا مُنذِرِينَ
فِيهَا يُفْرَقُ كُلُّ أَمْرٍ حَكِيمٍ
«Shyn máninde ony qutty bir keshte túsirdik. Rasynda, Biz eskertýshimiz. Ol keshte barlyq hıkmetti ister aırylady»[2]; bul túnde jer beti perishtelerge tolady:
تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِم مِّن كُلِّ أَمْرٍ
«Perishteler jáne Jebreıil (ǵ.s.) ol keshte Rabbylarynyń ruqsaty boıynsha barlyq is úshin túsedi»[3]; bul túnde kóńilder tynyshtyq tabady:
سَلَامٌ هِيَ حَتَّىٰ مَطْلَعِ الْفَجْرِ
«Ol beıbitshilik keshi, tań raýandaǵanǵa deıin jalǵasady»[4]; jáne eń mańyzdysy:
لَيْلَةُ الْقَدْرِ خَيْرٌ مِّنْ أَلْفِ شَهْرٍ
«Qadyr túni myń aıdan qaıyrly»[5].
Bul túnde Quran túsken, bul tún – Quran túni. Endeshe bul túnde Quran oqýdy kóbeıtý kerek. Ramazan boıy oqylǵan Qurannyń hatymyn jasaý kerek. Quranda meıirim aıaty kelse, Alladan meıirim tileńiz, azap aıaty kelse, odan aman bolýdy surańyz. Namazǵa turyńyz, namaz oqyńyz. Sebebi Paıǵambar (s.ǵ.s) bir hadısinde:
مَنْ قَامَ لَيْلَةَ الْقَدْرِ إِيمَانًا وَاحْتِسَابًا غُفِرَ لَهُ مَا تَقَدَّمَ مِنْ ذَنْبِهِ
«Kim Qadir túnin ıman etken, Alladan saýap kútken kúıi namazben ótkizse, onyń osyǵan deıin jasaǵan kúnálary keshiriledi»[6], – dese, taǵy bir hadısinde:
أَقْرَبُ ما يَكونُ العَبْدُ مِن رَبِّهِ، وهو ساجِدٌ
«Quldyń Rabbysyna eń jaqyn bolatyn sáti – sájdede»[7], – degen.
Qadyr túnin Quran oqýmen, namazben t.b. ıgiliktermen ásemdep, mol saýappen ótkizýge nıetteneıik. Qadyr túninde Alla Taǵala barsha duǵalarymyzdy qabyldap, kúnálarymyzdy keshirip, dárejemizdi ósirsin. Ámın!
Naýryzbaı qajy Taǵanuly
QMDB tóraǵasynyń birinshi orynbasary,
Naıb múftı, Nur-Sultan qalasynyń ókili,
«Áziret Sultan» meshitiniń Bas ımamy
