JARATQAN IE, KEShIRE GÓR!
Erte zamanda bir kedeı adam qalaǵa deıin jalańaıaq júrip, jaıaý barady. Onyń aıaǵynda aıaqkıimi, tipti satyp alatyn aqshasy da joq edi. Tipti aıaqtaryn qum kúıdirip, tastar tilimdep, tabanyn jara qylady.
Ormandaǵy haıýandardyń da aıaqtaryn tastan, tikennen qorǵaıtyn bir qasıeti bolatyny sekildi, ózine ondaı múmkindik bermegen Allanyń ádiletsizdigin aıtyp, ashy taǵdyryn oılap qaıǵyrady.
Sońynda úlken qalaǵa jetip, qaladaǵy meshitke keledi. Meshit aldyna kelse aldynda eki aıaǵy joq, qaıyr tilep otyrǵan qaıyrshyny kóredi. Muny kóredi de, táýbesine kelip, úlken oıǵa qalady.
«Taǵdyryma nalyǵanym durys emes eken. Aıaq kıimim joq bolsa da, bir tilim nan úshin arly-berlige súıretilip otyrǵan myna pendeden myń ese baqytty ekenmin… Burynǵy shaǵymym, buldanǵanym úshin Jaratqan Iem, keshire gór!», – dep meshitke kirip, tize búgip duǵa etip, táýbe etedi.
Meshitten kóńili birlenip, táýbege kelgenine shúkir etip, qaıtadan jolǵa shyǵady. Tas jolda birneshe kún júrip, aıaqtarynyń terisi qataıady. Osylaısha on eki múshesiniń saýlyǵyn tilep, Allaǵa shúkir etken álgi kedeı kúıip turǵan qumdardyń ústinde ketip bara jatqanyn elemegen de eken.
Iá, kez-kelgen adam Allaǵa shúkir etýi kerek. Óıtkeni Alla Taǵala Quranda: «Meni eske alyp, maǵan shúkirlik etińder de kúpirlik jasamańdar» – degen. Bul Baqara súresinde kelgen aıat. Demek, buıryq raıynda kelýi bizge shúkirlik etý mindetteledi. «Sol ýaqytta Rabbylaryń: «Eger shúkir etseńder, arttyra beremin. Al, eger qarsy kelseńder, azabym tym qatty» dep eskertedi» (Ibrahım súresi, 7-aıat).
Keıbireýler pendeshilikke salynyp Alla Taǵalanyń osynshama bergen jaqsylyqtaryn bile bermeıdi. Bul jaıly Alla Taǵala Quran Kárimniń Aǵraf súresiniń 10-aıatynda: «(Eı, Adam balalary) Biz senderdi jer betine ornalastyrdyq, sóıtip, onda sender úshin (iship-jeıtin taǵamdar, kıinetin kıimder, minis kólikteri sııaqty kóptegen) tirshilik zattaryn jasadyq. (Biraq) sender (ómirdiń qyzyǵyna berilip ketip, bular jaıly kem oılaısyńdar, sondyqtan) óte az shúkirshilik etesińder» deıdi.
Turar TÚGELULY
