Jasyl kúmbezsiz ómir súre almaımyn...

«Paıǵambar» degen sózdi aıtqanda, estigende  ár adamnyń júreginde erekshe bir áser óz izin qaldyryp jatady. Ol Paıǵambarymyz Muhammedke (s.ǵ.s.) degen mahabbat pen saǵynysh sezimi. Munymen sizder tolyq kelisedi degen senimdemin. Óıtkeni, Alla Taǵalanyń Ózi quldarynyń júregine Paıǵambaryna (s.ǵ.s.)  degen «mahabbat» sezimin salyp qoıǵan.  

Paıǵambarymyzǵa (s.ǵ.s.) degen sondaı bir súıispenshilikti sýretteıtin bir ǵalym kisi men kishkentaı bala arasynda bolǵan myna oqıǵa týraly estigen be edińiz?

Pákistandyq bir ǵalym qasıetti Madına qalasynda ornalasqan Paıǵambarymyzdyń (s.ǵ.s) meshitin zııarat etý úshin jolǵa shyǵady. Sol qalada bir qonaq  úıge turaqtaıdy. Tańerteń bólme terezesin ashyp, terezeniń túbine qonaqtaǵan qustarǵa nan qıqymdaryn berip turǵan sátte qustardyń aýzynan túsken nannyń qıqymdaryn terip jep otyrǵan terezeniń túbindegi   kishkentaı bir balaǵa kózi tústi.

Sol balaǵa degen aıanysh sezimi oıanyp, balany ózine shaqyryp, bólmege alyp keledi.  Tamaqtandyryp, ábden qarnyn toıǵyzyp bolǵannan keıin ǵalym  álgi baladan taǵdyry, ata-anasy, baýyrlary týraly suraı bastady.

- Men ákemdi es bilgeli beri kórgen emespin. Úıde jeti aǵaıyndymyz. Bárimizdi asyraýǵa anamnyń qaýqary da, aqshasy da joq. Sol sebepti, otbasymyzda árqaısymyz shamamyz jetkenshe ózimizge buıyrǵan nápaqamyzdy taýyp kúneltip  kelemiz, - dedi kishketaı bala móldiregen kózderi kúlimdep.

Ǵalym kisi ol balaǵa jany ashyp,  kúnde bólmesine kelip turýyn ótindi jáne ony qarny toıǵansha tamaqtandyrǵysy keletini týraly usynysyn aıtty. Bul usynysty bala da qabyl aldy. Kún ótken saıyn ekeýi bir-birine baýyr basyp, jaqyn bolyp ketti.

Biraz kún ótkennen keıin ǵalym kisi balaǵa:

- Menimen Pákistanǵa júr. Eshteńege muqtaj bolmaı, molshylyqta ómir súresiń. Sonymen qatar, Islam ǵylymdary týraly oqyp-bilesiń. Úlken ǵalym bolasyń, - dedi. Bala bul sózderge qatty qýanyp:
- Aldymen anamnan ruqsat surap kóreıin, - deıdi.

Ekeýi balanyń turatyn úıine keledi. Ǵalym balanyń anasymen suhbattasty. Turmys taýqymetinen ábden sharshaǵan ananyń janary muńdy, kózderi úmitsizdik men qaıǵyǵa  toly edi. Onymen qosa, syrqaty da syr berip, ólmestiń kúnin keship júr eken. Ǵalym kisiniń usynysy týraly estigende balasynyń joqshylyqtan qutylyp, oqyp bilim alýǵa, Islamdy zerttep ǵalym bolýǵa múmkindigi bar ekenine qatty qýandy.

Ýaqyt óte kele, ǵalym kisi men álgi balanyń Pákistanǵa jol júretin kúni de jaqyndaıdy. Bala ǵalym kisige kelip:

- Men Sizge Pákistan týraly birer suraq qoısam dep edim, - dedi.
- Árıne, suraı ǵoı.
- Ol jaqta men oınaıtyn oıynshyqtar bolady ma?
- Iá, ol jaqta sen oınaıtyn kóp oıynshyqtaryń bolady.
- Ol jaqta balalarǵa arnalǵan oıyn alańy bolady ma?
- Árıne, bolady. Ol jaqta balalarǵa arnalǵan oıyn alańdary óte kóp. 
- Ol jaqta meniń jańa kıimderim bolady ma?
- Alla qalasa, saǵan eń jaqsy, jańa kıimder satyp alyp berýge tyrysamyn.

Kókeıindegi suraqtarǵa qanaǵattanarlyq jaýap alǵan bala qatty qýanyp anasyna ketti. Arada biraz saǵat ótkennen keıin bala ǵalym kisiniń janyna kelip taǵy da:

- Siz turatyn Pákistanda Paıǵambarymyzdyń (s.ǵ.s.) meshitindegideı jasyl kúmbezder bar ma?  -dep surady. Ǵalym oǵan:
- Joq, mundaı jasyl kúmbez bizde joq. Joq bolǵandyǵy sebepti, Ony (s.ǵ.s.) saǵynyp, bir kórýge asyq bolyp osy mekenge keldim emes pe?! - dedi. Bala biraz ýaqyt únsiz qaldy. Tereń oıǵa shomdy da:
- Men jańa kıimdersiz ómir súre alamyn. Oıynshyqtarsyz ómir súre alamyn. Maǵan oıyn alańdary da kerek emes. Men jańa úısiz de ómir súre alamyn. Biraq, men Paıǵambarymyzdyń (s.ǵ.s.) meshitiniń jasyl kúmbezinsiz ómir súre almaımyn. Júregim shaqyrǵan sátte, qalaǵan ýaqytymda kelip, qalaǵan ýaqytymda jylap, muńymdy shaǵa alatyn bul meshitsiz ómir súre almaımyn. Siz meni keshirińiz, men sizben birge ol elge bara almaımyn, - dedi de úıine qaraı bet alady.

Ǵalym kisi eshteńe demesten biraz ýaqyt únsiz turyp qaldy. Kózine eriksiz kelgen jasty tyıa almastan:

- Men saǵan budan asqan qandaı baqytty syılaı alamyn? Ýa, Jaratýshy Iem, maǵan Saǵan degen myqty ıman jáne myna balanyń júregindegideı Paıǵambarymyzǵa (s.ǵ.s.) degen súıispenshilik pen mahabbatty násip et! - dep qolyn jaıyp duǵa jasady.

Adamzattyń ardaqtysy, súıikti Paıǵambarymyz Muhammedke Allanyń ıgiligi men sálemi bolsyn!  

Laýra Almahanova