JETESTIŃ KÁRILIK TÝRALY AITQANY

Qara kisi rýynyń Jaǵal degen bir azamaty jasy seksenge kelip qartaıyp otyrǵan kishi júz Jahaıym Jetes bımen áńgime ústinde:

—     Iá, Jeteke, siz seksenge keldińiz, árbir on jyldy bir beleske qoıǵanda, ne nársege teńer edińiz? — degen eken.

Sonda Jetes sál oılanyp alyp:

- E, qaraǵym-aı, men on jasymda asyq oınadym, qyzyǵyna toımadym, qatar balalardyń asyǵyn utyp qoımadym; jıyrmaǵa keldim, boıǵa jetip boıladym, onda da balalyqty qoımadym. Jıyrma beske jettim, jaqsy iske súıindim, jaman iske kúıindim, barymdy boıǵa kıindim, sulý qyz-kelinshek bolsa, soǵan shúıildim; otyzǵa keldim: qyzyl altaıy túlki boldym, qyran búrkitke aldyrmadym, qumaı tazyǵa shaldyrmadym, qatar qurbymnyń kóńilin qaldyrmadym; qyryqqa jettim: arǵymaqtaı ańqyldadym, taý qyrandaı shańqyldadym, aq almastaı jarqyldadym, darııadaı sarqyldadym. Elýge keldim: bıik bir qara tóbeniń basyna shyqtym, aldy-artymdy tegis kórdim, biraq qaı jaǵy alys, qaı jaǵy jaqyn ekenin bile almadym; alpysqa jettim: alty taraý jolǵa kezdestim, qaısysyna túsýdi bilmeı daǵdarysqa ushyradym. Jetpiske keldim: jeńilgenimdi bildim, bılikti bala-shaǵaǵa berdim, aıtqanyna kóndim, jetegine erdim; tap osy kúni seksendemin: aldym tereń quz, artym bıik jar, sol jaǵym — sý, oń jaǵym — ot, qalaı qaraı qozǵalsam da, maǵan tirilik tirlik emes-aý! — degen eken.