JIGITTIŃ BAǴY -AQYLDY JARY

Ertede úsh-tórt jolaýshy bir aýyldyń ústinen ótip bara jatady. Kún nuryn tógip, tańǵy tirshilik bastalǵanymen, aýyl oıana qoımaǵan. Kedeı aýyl ekeni kózge uryp tur:

Tozyǵy jetken kıiz úıler, qorada qamaýly sanaýly qozy-laqtar...

Jolaýshylardyń shettegi jupyny úıge nazarlary eriksiz aýdy. Úıdiń aınalasy jınaqy.  Esiginiń aldynda eski bolǵanmen kóılegi men oramaly tap-taza kelinshek ándetip, samaýrynǵa sháı qoıǵaly júr eken.

Jolaýshylardyń úıine qaraı burylǵanyn kórgen kelinshek ıilip sálem berdi.

-  Otaǵasy úıde bolar, sýsyn iship, orazamyzdy  ashsaq - dep sóz bastady aldyńǵy attaǵy kisi.

- Iıa, ııa, úıge kirińizder - dep kelinshek qonaqtarǵa jyly lebiz bildirip, olar attan túskenshe úıge kirip ketti. Artynsha úıden otaǵasy shyǵyp, amandasyp, qonaqtardy úıge kirgizdi.

Amandyq surasqan soń otaǵasy:

- Úıdegi baryńdy ákel, qonaqtarǵa - dep daýystady kelinshegine.

Kelinshek úndemeı júrip dastarhan jaıyp, nanyn qoıdy. Shyǵyp ketip, tabaǵy, pyshaǵyn qosyp, qaýyn ákeldi. Otaǵasy qaýyndy qolǵa aldy. Qaýynnyń bir jaǵy shirı bastaǵan eken. Jigit kelinshegin shaqyryp, basqa qaýyn ákelýin buıyrdy.

Kelinshek úndemeı qaýyndy alyp ketti de, azdan soń qaýynymen qaıta kirdi. Otaǵasy qaýyndy qolǵa alyp, qaıta daýystap, shaqyrdy.

- Myna qaýynyń da shirı bastapty. Basqasyn ákel! - dep kelinsheginiń qolyna qaýyndy ustatty.

Jaǵdaı qaıtalandy.

Jigit kelinshegine ashýlandy.

Kelinshekte ún joq.

Tórde bárin baqylap otyrǵan qonaq:

-  Jigitim, bosqa ashýlanba!. Kelinshegiń aqyldy jan eken. Úıińdegi jalǵyz qaýyndy úsh ret alyp kirdi. Basqasy joq dep qonaqtardyń kózinshe betińnen almady.  Ózge áıel bolsa, óziń tappaǵan dúnıeni qaıdan alamyn dep ashýlanar edi. Alla kelinshegińniń peıiline beredi. Baqytty bolyńdar! - dep, shirı bastasa da dámi til úıirgen qaýyndy jep,  batalaryn berip attanady qonaqtar.

Arada birneshe kún ótkende bir jigit birneshe jylqy, sıyry, qoı-eshkisi bar maldy aıdap kelip jigitke tapsyrady. Tań qalǵan jigitke:

- Ótkende úıińizge qonaqtar kelip edi ǵoı.  Ol patsha men onyń nókerleri bolatyn. Patsha sizdiń jaryńyzǵa rıza bolypty. Myna maldy az jylda kóbeıtip, kúıeýin baqýatty etedi. Ózderi ósip-ónip, úlken áýletke aınalsyn. Osyndaı aqyldy analardan týǵan urpaqqa elimizdiń bolashaǵyn senip tapsyrýǵa bolady dep sálem aıtty - dep, patshanyń sálemin jetkizgen álgi jigit attanyp ketipti.

... Aqyldy áıel qashan da eriniń janashyry ǵoı. Tek yntymaqtary jarasyp, bir-birine keshirimdi bola bilse bolǵany