164 222 qaıyrymdylyq sharalary atqaryldy (FOTO)
QMDB Tóraǵasy, Bas múftı Naýryzbaı qajy Taǵanulynyń tóraǵalyǵymen orazanyń birinshi aptasyn qorytyndylaýǵa arnalǵan jıynda QMDB bólim basshylary Ramazannyń alǵashqy aptasynda atqarylǵan is-sharalardyń esebin tanystyrdy.
QMDB Ýaǵyz-nasıhat bóliminiń meńgerýshisi Batyrjan Mansurov barlyq óńirde bilikti ımamdar men ustazdar, RANT músheleri men JANT músheleri «Otyz kúnge otyz ýaǵyz» atty tikeleı Efırde onlaın ýaǵyz-nasıhat jumystaryn qolǵa alǵanyn málimdedi.
«Óńirlerde bas ımamdar qasıetti Ramazan aıynyń ár aptasynda «Bas ımam minberi» aıdary boıynsha tikeleı Efırge shyǵyp, oraza jaıyndaǵy suraqtarǵa jaýap berýde. Ramazan aıyna oraı óńirlerde ár apta saıyn tikeleı suhbattar men oblys ortalyqtary men keıbir aýdandarda onlaın rejımde «Quran hatym» oqý sharasy uıymdastyrylýda. Orys tildi RANT músheleriniń «Naýka ıhsan», «Ýrokı po veroýbejdenııý», «Istorııa prorokov» syndy taqyryptarda ýaǵyz-nasıhattar arnaıy taspaǵa túsirilip, YouTube áleýmettik jelisindegi Mýftııat kanalyna júkteldi. Instagram áleýmettik jelisiniń @hikmet.tv paraqshasynda aptasyna bir ret orys tildi RANT músheleri «Sharıatskıe osnovy vedenııa bıznesa», «Etıka Islama», «Istorııa prorokov» degen taqyryptar boıynsha ýaǵyz-nasıhat jumystaryn júrgizý ústinde. Ár aı saıyn árbir óńirge belgili taqyryptar bólinip berilip, sol boıynsha vıdeo ýaǵyz ázirlenip, tekserilip YouTube áleýmettik jelisindegi resmı paraqshalarymyzǵa jarııalanýda» dedi Batyrjan Mansurov.
QMDB «Zeket jáne qaıyrymdylyq» qorynyń dırektory Talǵat Omarov Ramazan aıynyń alǵashqy aptasy «Ómirge úmit syıla» aktsııasyna arnalyp, juqpaly dertpen aıanbaı kúresip jatqan medıtsına qyzmetkerlerine azyq-túlik sebetterimen qaıyrymdylyq kómek kórsetilgenin jetkizdi.
«Alǵashqy is-sharaǵa Bas múftı Naýryzbaı qajy Taǵanuly bastap baryp, elordadaǵy №1 kópsalaly aýrýhanaǵa 3 dana ottegi kontsentratory, 30 dana pýlsoksımetr, 30 dana tynys alýǵa arnalǵan jabdyq (shlang) tabystaldy. Sondaı-aq «Berekeli Ramazan syıy» aktsııasymen aýrýhananyń 150 qyzmetkerine azyq-túlik sebetteri taratyldy. Igi shara Ramazan aıy men el táýelsizdiginiń 30 jyldyǵyna oraı uıymdastyryldy. Sondaı-aq «Aýyzashar sebeti» respýblıka boıynsha 57533 otbasyǵa taratyldy.
Jalpy atqarylǵan qaıyrymdylyq is-sharalar sany – 164 222, kómek alǵan otbasylar sany – 550 104, al qaıyrymdylyqqa jumsalǵan qarajat kólemi – 203 682 860 teńge» dep atap ótti Talǵat Omarov.
