«Abaı» kitaphanasynan medıtsına buryshy ashyldy (FOTO)

26 aqpan 2021 346 0
Оqý rejımi

Budan birneshe aı buryn QMDB Ortalyq apparaty ǵımaratynda resmı túrde ashylǵan «Abaı» kitaphanasy jańa kitappen tolyqty.

Byltyr qyrkúıek aıynda Bas múftı Naýryzbaı qajy Taǵanulynyń qatysýymen tanytymy ótken «Hıjama jasaýdyń jetildirilgen ádisi» kitaby «Abaı» kitaphanasyna qoıyldy. Dinı basqarmanyń Qajylyq bóliminiń meńgerýshisi Jándillá Bekjigittiń aıtýynsha, «Abaı» kitaphanasynda kitap qory birneshe toptamaǵa bólingen. Máselen Quran Kárim buryshynda álemniń 12 tiline aýdarylǵan quran kitaptary qoıylsa, ózge bólimderde el tarıhyna, táýelsizdikke qatysty kitaptar tizilgen.

«Islamtaný salasynda «Paıǵambar medıtsınasy» degen úlken taraý bar. Ol jóninde ýaqytynda talaı eńbek jazyldy, zertteldi, áli kúnge deıin álem halqynyń kádesine jarap keledi. Sol sekildi hıjama týraly eńbek jazǵan Bıjan Maratulynyń tyrnaqaldy týyndysyn arnaıy medıtsına buryshyna qoıyp otyrmyz» deıdi Jándillá Bekjigit.

Otyz elde bolyp, medıtsına salasynda tájirıbe jınaǵan, hıjama jasaýdan 13 jyldyq ótili bar bilikti maman Bıjan Maratuly bul kitaptyń Dinı basqarmanyń «Abaı» kitaphanasynan tabylǵanyna qýanyshty ekenin aıtady.

«Hıjama jasaý – emdik shara ári saýapty is. Óıtkeni bul – Paıǵambarymyzdyń (oǵan Allanyń salaýaty men sálemi bolsyn) súnnetinen. Al ol jaıly ózim ǵana bilip qoımaı, bilgenimdi musylman baýyrlarymmen bóliseıin, oqyrmanǵa jetkizeıin degen nıetpen osy kitapty daıyndadym. Osy eńbektiń shyǵýyna atsalysqan barsha din qyzmetkerlerine alǵysymdy bildiremin. Dinı saraptama sektory kitapqa oń baǵasyn berip, kúzde Bas múftıdiń qatysýymen alǵashqy tanytymy ótti. Endi minekı, Qazaqstan musylmandarynyń qara shańyraǵy Dinı basqarmanyń kitaphanasyna qoıyp ári osyndaǵy barsha aǵalarymyzǵa, din mamandaryna syıǵa tartyp otyrmyn» deıdi B.Maratuly.   

Sondaı-aq kitap avtory Dinı basqarmaǵa kádesyı retinde Paıǵambar (ﷺ) medıtsınasyn sıpattaıtyn erekshe músindi syılady. Músin akrıl gıpsi men keramıka, polıýretan men Emal qospalarynan 2 jyl ishinde daıyndalǵan.

Pіkіrler Kіrý