Alban musylmandary qajylyqqa velosıpedpen shyqty
Albanııalyq eki musylman qajylyq saparyna velosıpedpen shyqty, dep habarlaıdy TRT túrkııalyq telearnasy.
Imam Ámir Aslanı men dosy Senad Idrısı kásibı velosıpedshi, sol sebepti jol aýyrtpashylyǵyn sezinip, bel sheship shyǵyp otyr, dep jazady ummamag.kg.
«Biz ilgergi ýaqyttaǵy musylmandar basynan ótkergen qajylyq saparynyń synaqtarynan ótkimiz keledi. Kezinde musylmandar ıslam dininiń úlken paryzy – qajylyqty oryndaý úshin uzaq joldar júrip, ter tókken» deıdi Ámir men Sanad.
Olar osy saparǵa eki jyl buryn daıyndyqty bastaǵan eken. Alty aptaǵa josparlanǵan saparda olar bes memleketti kesip ótedi: Albanııa, Grekııa, Egeı teńizi arqyly Túrkııa tarapy, Jerorta teńizi arqyly Egıpetke, Akaba shyǵanaǵymen keme arqyly Hıjazǵa Mekke men Mádına qalasyna jetýdi josparlaıdy.
«Biz qazirdiń ózinde Albanııada nóserli jaýyndy kórdik. Biz aldaǵy saparymyzda aptapty ystyqty kóretinimizdi sezinemiz. Barlyq qıyndyqtarǵa daıynbyz dep oılaımyn» dedi Aslanı.
Olar Mekke qalasyna qajylyq jasaýmen qatar, Túrkııa men Mysyr elderindegi qasıetti oryndardy aralaýdy kózdeıdi. «Biz eshbir qıyndyqqa moıymastan barsha musylmandardy qajylyq jasaýǵa shaqyramyz» deıdi velosıpedshi qajylar.
