Almatyda «Abaı Qunanbaıuly» meshiti ashyldy (FOTO)

07 mamyr 2021 3617 0
Оqý rejımi

Búgin Alladan saýap úmit etken jomart jandardyń demeýshiligimen Almaty qalasy Jetisý aýdanynda «Abaı Qunanbaıuly» meshiti esigin aıqara ashyp, el ıgiligine paıdalanýǵa berildi.

Meshittiń ashylý saltanatyna QMDB Tóraǵasy, Bas múftı Naýryzbaı qajy Taǵanuly, QMDB Apparat basshysy Ǵylymbek Májıev, Sharıǵat jáne pátýa bóliminiń basshysy Sansyzbaı Qurbanuly, Aqparat jáne qoǵammen baılanys bóliminiń meńgerýshisi Marat Bektazın, Din isteri jáne taldaý bóliminiń meńgerýshisi Nurbek Esmaǵambet, Almaty qalasynyń bas ımamy Erkinbek Shoqaı, Almaty qalasy Din isteri basqarasynyń basshysy Nurlan Kıkımov, meshit salýǵa atsalysqan kásipker azamattar, meshit qyzmetkerleri jáne qala turǵyndary qatysty.

Meshittiń ashylý rásimi qalanyń bas ımamy Erkinbek Shoqaıdyń Quran oqýymen bastaldy. Qurannyń batasyn Bas múftı Naýryzbaı qajy Taǵanuly jasady. Meshittiń ashylý saltanatynyń alǵashqy quttyqtaý sózin QMDB Tóraǵasy, Bas múftı Naýryzbaı qajy Taǵanuly aıtty. Bas múftı óz sózinde dinimizdegi meshit salýdyń saýaby men qoǵamnyń turaqtylyǵyna tıgizer paıdasyna toqtaldy. Qasıetti Qurannyń «Rasynda Allanyń meshitterin Allaǵa jáne aqyret kúnine ıman keltirgen, sondaı-aq namaz oqyp, zeket bergen jáne tek Alladan qorqatyn (pende) ǵana turǵyzady» degen aıatyn tilge tıek etti. Saýaby mol Ramazan aıynda meshit salǵan el azamattaryna úlken alǵys bildirdi. Sóz sońynda jańa meshit jastarǵa rýhanı tárbıe beretin jáne dástúrli dinimizdi nasıhattaıtyn ımandylyqtyń ordasyna aınalsyn dep tilek tiledi. Sonymen qatar «Abaı Qunanbaıuly» meshitine arnalǵan estelik syılyqty bas ımam Erjan Tólepovke tabystady.

Almaty qalasy Din isteri basqarasynyń basshysy Nurlan Kıkımov, qaladaǵy burynǵy «Amın» meshitiniń orynyna qaıta salynǵan meshittiń ashylýymen qonaqtardy quttyqtady. Hákim Abaıdyń atyn alǵan meshittiń qala kórkine kórik qosatyn ordalardyń birine aınalǵanyn aıtyp, óz qýanyshyn jetkizdi.

Aýdannyń turǵylyqty aqsaqaly, meshit jamaǵaty Tursyn aqsaqal qulshylyq ordasyn salǵan jomart jandarǵa, jergilikti bılik pen Dinı basqarma ókilderine el atynan alǵys bildirdi. Sosyn jańa meshittiń lentasy qıylyp, qonaqtar qulshylyq úıine kirip eki bas namaz oqydy.

Bas múftı jamaǵatqa tálimdi ýaǵyzyn aıtyp, el men jerdiń tynyshtyǵy úshin qol jaıyp duǵa jasady.

Pіkіrler Kіrý