Aqtóbe oblysyna bas ımam taǵaıyndaldy (FOTO)
Qasıetti juma kúni Bas múftı Naýryzbaı qajy Taǵanuly hazrettiń buıryǵymen QMDB Aqtóbe oblysynyń bas ımamy bolyp Serikjan Enshibaıuly taǵaıyndaldy.
Aqtóbe oblysynyń ákimi Ońdasyn Orazalın QMDB Din isteri jáne taldaý bóliminiń meńgerýshisi Nurbek Esmaǵanbet, ımamdar Tólebı Ospan men Serikjan Enshibaıdy qabyldady. Nurbek Áýezhanuly ákimge Bas múftıdiń sálemin jetkizip, jańadan taǵaıyndalǵan bas ımam Serikjan Enshibaıulyn tanystyrdy. Óz kezeginde oblys ákimi Ońdasyn Seıiluly osy ýaqytqa deıin Aqtóbe oblysynyń bas ımamy qyzmetin atqarǵan Tólebı Dádilulyna rızashylyǵyn bildirip, alǵys hatpen marapattady.
Juma namazyna jınalǵan jamaǵatqa QMDB Din isteri jáne taldaý bóliminiń meńgerýshisi Bas múftıdiń ystyq yqylasy men sálemin jetkizip, jańadan taǵaıyndalǵan bas ımamdy tanystyrdy. Sonymen qatar jańa ımamnyń aldaǵy ýaqytta atqarar qyzmetine sáttilik tiledi.
Aqtóbelik jamaǵat buǵan deıin Aqtóbe oblysynyń bas ımamy qyzmetin atqarǵan Tólebı Ospannyń ıyǵyna shapan jaýyp, alǵys bildirdi.
«Tólebı Dádiluly osy jyldar ishinde Aqtóbe oblystyq ókildiginiń qyzmetin jandandyryp, oblystaǵy dinı ahýaldy jaqsartýǵa kúsh saldy. Dinı maman turaqtandyrý, dinı kadr daıarlaý isterin jolǵa qoıdy. Imamdar arasynda orta jáne joǵary dinı bilimdilerdiń sany 70 paıyzǵa deıin kóterildi. Alla razy bolsyn! Jańadan kelip jatqan bas ımam da ózderińizge bóten emes. Aqtóbe oblysynda 5 jyldaı oblystyq, qalalyq meshitterde qyzmet etken. Doktorant, tájirbıeli dinı maman. Qoldaý bildiresizder dep senemiz. Alla Taǵala eki ımamǵa da jar bolǵaı!» - dedi Nurbek Áýezhanuly.
Serikjan Enshibaıuly 1982 jyldyń 8 qyrkúıeginde Monǵolııanyń Baıan-Ólgıı aımaǵynda dúnıege kelgen.
Bilimi:
– 2000-2004 jyldary Shymkent qalasyndaǵy Halyqaralyq qazaq-arab ýnıversıtetin Dintanýshy jáne arab tili pániniń muǵalimi mamandyǵy boıynsha oqyp, bitirgen;
– 2004-2007 jyldary Túrkııanyń Konııa qalasyndaǵy «Hasekı» akademııasynda oqydy;
– 2009-2011 jyldary ál-Farabı atyndaǵy QazUÝ-dyń Fılosofııa jáne saıasattaný fakýltetiniń magıstratýrasynda oqyp, Dintaný magıstri atandy;
– 2016 jyly Mysyrdaǵy ál-Azhar ýnıversıtetinde Dar al-Ifta (Pátýa bólimi) 2 aılyq bilim jetildirý kýrsynan ótken;
– 2018 jyldan bastap Nur-Múbarak ýnıversıtetiniń doktoranty.
Eńbek joly:
– 2007-2012 jyldary QMDB Sharıǵat jáne pátýa bóliminiń referenti;
– 2012-2015 jyldary Aqtóbe oblystyq ortalyq «Nur ǵasyr» meshitiniń naıb ımamy;
– 2015-2017 jyldary Aqtóbe qalalyq ortalyq meshitiniń bas ımamy;
– 2012-2017 jyldary Aqtóbe oblystyq Din ister basqarmasy janyndaǵy «Ansar» mekemesiniń teology retinde (ımamdyq qyzmetpen qatar kelisimshart negizinde) destrýktıvti dinı aǵym ókilderine túsindirme jumystaryn júrgizdi;
– 2017-2018 jyldary Atyraý qalasy «át-Taqýa» meshitiniń naıb ımamy jáne «Shapaǵat» ortalyǵynyń teology (kelisimshart negizinde) qyzmetin atqardy; – 2018-2021 jyldary Almaty qalasyndaǵy «Ibrahım» meshitiniń bas ımamy; – 2016 jyldan bastap Respýblıkalyq aqparat nasıhat tobynyń (RANT) múshesi.
Úılengen, 4 qyzy, 1 uly bar.
