Aqtóbe: Óńirlik talapkerlerge – sát sapar!

Búgin «Nur Ǵasyr» oblystyq ortalyq meshitinde ókil ımam Tólebı qajy Ospan men oblystyq Din isteri basqarmasynyń basshysy Álimbek Turalıev búgingi medrese túlekteri – erteńgi stýdent jastarmen kezdesti. Mazmundy basqosý barysynda din salasynyń ókilderi bıyl Aqtóbe medrese mektebin bitirip, Qazaqstannyń joǵarǵy dinı oqý oryndarynyń stýdenti atanǵan jastardy quttyqtap, aǵalyq aqyl-keńesterin aıtty.

Aıta keteıik, 3 tamyzda elimizdegi aldyńǵy qatarly teologııalyq oqý ornynda tegin bilim alǵysy keletin jas talapkerlerdiń qujattaryn qabyldaý bastalǵan bolatyn. 14 tamyzda oblys ákimi óńirdegi suranysqa ıe mamandyqtarǵa arnaıy bólgen 100 granttyń ıegerlerin anyqtaý boıynsha komıssııa otyrysy boldy. Aımaq basshysy Ońdasyn Orazalınniń tóraǵalyǵymen ótken jıynǵa oblys ákiminiń orynbasary, komıssııa músheleri men basqarma basshylary qatysty.

100 granttyń 8-i Almaty qalasyndaǵy «Nur Múbarak» Egıpet ıslam mádenıeti ýnıversıtetinde Aqtóbe oblysynan dinı mamandardy daıyndaý maqsatynda, sonyń ishinde «ıslamtaný» mamandyǵy boıynsha tuńǵysh ret bólinip otyr. Jalpy, bıyl atalǵan ýnıversıtette aqtóbelik 19 talapker grant ıegeri atandy. Óz kezeginde bul – óńirimizdi bilimdi de bilikti din salasy mamandarymen qamtamasyz etýge múmkindik beretini sózsiz. Al grant utyp alǵan jas talapkerler bolashaqta oblysymyzda ımam nemese teolog mamany retinde qyzmet atqarýyna bolady.

Meshit qabyrǵasyndaǵy kezdesý barysynda óńirdegi din basshylary kóptegen ózekti máselege jan-jaqty toqtalyp, jastar tarapynan qoıylǵan suraqtarǵa naqtyly jaýap qaıtardy. Ári óńirlik talapkerlerge – bolashaq aqtóbelik stýdentterge sát sapar tiledi.