ASTANA IMAMDARYNA «DIPFEIK» ÚKIMI TANYSTYRYLDY

«Áziret Sultan» meshitinde Astana qalasynyń ımamdaryna «Dıpfeık (Deepfake)» úkimi tanystyryldy. Jıyndy Sharıǵat jáne pátýa bóliminiń Astana qalasy boıynsha ókildigine jaýapty maman Tamırlan Darhanuly ótkizdi.

Jasandy ıntellekt tehnologııalarynyń damýyna baılanysty qoǵamda ózekti bolyp otyrǵan máselelerdiń biri – dıpfeık tehnologııasyn qoldanýdyń sharıǵı turǵydaǵy úkimi túsindirildi.

Semınar barysynda dıpfeık arqyly adamnyń shyn máninde aıtpaǵan sózderin aıtqandaı nemese jasamaǵan is-áreketterin jasaǵandaı etip kórsetý, jalǵan aqparat taratý jáne adamdardy aldaý áreketteriniń sharıǵatta tyıym salynǵany aıtyldy.

Sondaı-aq mundaı tehnologııany teris maqsatta paıdalaný qoǵam tynyshtyǵyna zııan keltirip, adamdar arasynda túsinispeýshilik pen iritki týǵyzýy múmkin ekeni atap ótildi. Islam dini ǵylym men tehnologııanyń damýyna tyıym salmaıdy. Alaıda kez kelgen tehnologııa adamzat ıgiligine qyzmet etip, ádilettilik pen adamgershilik qaǵıdalaryna jáne sharıǵat talaptaryna qaıshy kelmeýi tıis.

Semınar barysynda Paıǵambarymyzdyń (oǵan Allanyń salaýaty men sálemi bolsyn) «Kim bizdi aldasa – ol bizden emes» degen hadısi negizinde aldaýdyń barlyq túrinen saqtaný qajettigi túsindirildi.

Источник: Aisha