«ASTANA» medresesi kolledj mártebesin aldy (FOTO)
«Qazaqstan musylmandary dinı basqarmasy» respýblıkalyq ıslamı dinı birlestiginiń «Astana medresesi» jeke mekemesi – eńseli Elordamyzdaǵy otandyq dinı mamandardy ázirleıtin bilim ordasy.
2007 jyldyń 1 shildesinde QR Tuńǵysh Prezıdenti, Elbasy N.Á.Nazarbaevtyń qatysýymen ashylǵan medrese búgingi kúnge deıin 300-den astam orta býyndy din mamandaryn ázirledi.
Sońǵy jyldary Qazaqstan musylmandary dinı basqarmasy dinı bilim berý salasynda birqatar bastamalardy júzege asyryp, medreselerdi zamanaýı kolledjdermen terezesin teńestirip, orta bilimdi maman daıyndaıtyn oqý oryndaryna aınaldyryp úlgerdi. Kóshten qalmaı, medreselerdegi oqý júıesi de Qazaqstan Respýblıkasynyń memlekettik jalpyǵa mindetti bilim berý standarttaryna sáıkestendirilýde.
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń tapsyrmasymen Astana medresesi memlekettik mekemeler tarapynan qoıylatyn barlyq talaptardy oryndap, osy jyldyń qyrkúıek aıynda «QR BjǴM Bilim jáne Ǵylym salasynda sapany qamtamasyz etý komıtetiniń Nur-Sultan qalasyndaǵy bilim salasynda sapany qamtamasyz etý departamenti» memlekettik mekemesi tarapynan «Astana medrese kolledji» jeke mekemesine tehnıkalyq jáne kásiptik bilimniń bilim berý baǵdarlamalaryn júrgizý quqyǵyna №KZ72LAA00018887 lıtsenzııa jáne 011201 3 «Imam hatıb» biliktiligi boıynsha lıtsenzııa qosymshasyn ıelendi.
Oqý orny Qazaqstan Respýblıkasynyń memlekettik jalpyǵa mindetti bilim berý standarttary negizinde «Islamtaný» mamandaryn daıyndaýdy júzege asyrady. Oqý ornyndaǵy oqý protsesi – kúndizgi. Jalpy orta bilim negizinde normatıvtik oqý merzimi – 2 jyl 10 aı. Astana medrese kolledjiniń quryltaıshysy – Qazaqstan musylmandary dinı basqarmasy.
