Astanada «Aıt – tatýlyq merekesi» atty rýhanı semınar ótti

«Áziret Sultan» meshitinde Qurban aıt merekesi qarsańynda áıel jamaǵatyna arnalǵan «Aıt – tatýlyq merekesi» atty rýhanı semınar ótti.

Is-sharanyń maqsaty – qasıetti merekeniń qurmetine oraı qoǵamdaǵy renish pen ókpe-arazdyqty azaıtyp, adamdar arasynda keshirim, tatýlyq jáne baýyrmaldyq qundylyqtaryn nasıhattaý.

Semınarda «Áziret Sultan» meshitiniń naıb ımamy Abdýlahad Smanov keshirimniń qadiri, týystyq baılanysty saqtaýdyń mańyzy jáne Qurban aıttyń rýhanı máni týraly nasıhat aıtty. Astana qalasy Áıel-qyzdar sektorynyń jetekshisi Kúlsara Mamyrqyzy, tatýlyq pen aýyzbirshiliktiń mańyzyna toqtalsa, is-sharany «Áziret Sultan» meshitiniń ustazy Ersaıyn Qabylqanuly júrgizip, keshtiń mazmundy ári taǵylymdy ótýine uıytqy boldy.

Semınardyń eń áserli bóligi «Keshirim aǵashy» atty tájirıbelik bólim boldy. Qatysýshylar ózderi renjisip júrgen jandardy eske alyp, arnaıy qaǵazdarǵa «Kórshimdi keshirdim», «Baýyrymdy keshirdim», «Renishti qoıdym», «Sen de meni keshir» sekildi júrek sózderin jazyp, aǵash butaqtaryna ornalastyrdy.

Bul sát kópshilikke erekshe áser etti. Qatysýshylar júrekterindegi ókpe-renishten arylyp, jaqyndarymen tatýlasýǵa nıet bildirdi. Is-shara sońynda qatysýshylarǵa aıttyq syılyqtar tabystalyp, estelikke sýretke tústi.

Источник: Aisha