ASTANADA «HALAL EXPO-2022» KÓRMESI BASTALDY (FOTO)
Elordasy Astanadadaǵy «EXPO» halyqaralyq kórme ortalyǵynda QMDB «Halal Damý» standarttaý jáne sertıfıkattaý mekemesiniń uıymdastyrýymen halyqaralyq «HALAL EXPO-2022» kórmesi bastaldy.
Kórmeniń ashylýyna qatysqan QMDB Tóraǵasynyń orynbasary Ershat Aǵybaıuly Bas múftı Naýryzbaı qajy Taǵanulynyń sálemin jetkizip, beınequttyqtaýyn nazarǵa usyndy.
«Astyń adaldyǵyn bastyń amandyǵyna balaıtyn dana halqymyz úshin qazirgi tańda da halal ónimdi tutyný asa mańyzdy. Endeshe elimizde halal óndirisiniń damýy – turǵyndardyń taza Ekologııalyq ónimdi tutynyp, densaýlyǵyn kútip ustaýyna ǵana emes, onyń rýhynyń da myqty bolýyna septigin tıgizeri sózsiz.
Búgingi halyqaralyq kórme elimizde halal óndirisiniń ilgeri damýyna serpin bererine senimim kámil. Dinı basqarma uıymdastyryp otyrǵan osy kórme jumysyna sáttilik tileımin.
El turǵyndaryn adal astyń aıqyn belgisi – «Halal Damý» sertıfıkatyn ıelengen ónimderdi tutynýǵa, al taǵam óndiretin kásiporyndardy halal standartyna saı jumys isteýge shaqyramyn» delingen Bas múftı quttyqtaýynda.
Aıta keteıik, eki kúnge sozylatyn kórmege «QMDB Halal» tańbasymen halal ónim óndiretin otandyq kásipkerlermen birge Qyrǵyzstan men Ózbekstan memleketterinen kelgen 100-ge jýyq kásiporynnyń taýarlary (et, qus, sút, balyq, bal, maı ónimderi, jartylaı daıyn jáne kondıterlik ónimder, Halal kosmetıkalar, shujyqtar, BAD, taǵam qospalary, gıgıenalyq zattar, jýǵysh zattar, fast-fýdtar, balmuzdaqtar, sýsyndar, t.b.) qoıylǵan. Kórme barysynda semınar-trenıng uıymdastyrylyp, úzdik halal kásiporyndarǵa Bas múftıdiń alǵys haty berildi.
