Astanada táýlik boıy jumys isteıtin kitaphana ashyldy
Astana qalasyndaǵy Nazarbaev ýnıversıtetiniń kitaphanasynda 400 adamǵa arnalǵan táýlik boıy jumys isteıtin 4 zal ashyldy.
Jańadan iske qosylǵan zaldardyń jalpy aýdany 10 000 sharshy metrden asady. Infraqurylymǵa jańa kompıýterlik bólmeler, mýltımedıalyq kabınetter, toptyq jáne jeke oqý synyptary, ınklıýzıvti bilim berý jabdyqtary, konferentsııa zaldary, demalýy bólmesi, aýdıo-vızýaldy stýdııa men balalar bólmesi kiredi.
«Nazarbaev ýnıversıtet» kitaphanasynyń bıblıografııalyq-aqparattyq qyzmetiniń basshysy Madına Qaıratbekqyzynyń aıtýynsha, kitaphanada buǵan deıin oqyrmandar úshin 2 zal ǵana jumys istegen. Endi kitaphananyń aýqymy taǵy 4 zalmen tolyǵyp otyr.
«Science, Astana, Aliya, Quiet dep atalatyn jańa zaldar iske qosyldy. Stýdentterimizdiń osyndaı qosymsha múmkindikterge ıe bolǵanyna qýanyshtymyz. Olar burynǵydaı kitaphanashylardyń jumys isteý ýaqytyna táýeldi bolmaı, endi 24 saǵat boıy oqý zaldarynyń barlyq múmkindikterin paıdalana alady. Stýdentter qaýymdastyǵy tarapynan táýlik boıy jumys isteıtin arnaıy zaldar bolsa degen usynystar tústi. Basshylar jas ǵalymdardyń bul bastamasyn qoldap, nátıjesinde osyndaı jetistikke jetip otyrmyz. Biz Qazaqstannyń 2050 jylǵa deıingi damý Strategııasyna sáıkes qazaqstandyq kitaphanashylardyń biliktiligin arttyryp, kásibı kitaphanashylardyń qaýymdastyǵyn qurýdamyz», dedi Mádına Qaıratbekqyzy saltanatty sharanyń ashylýynda.
Kitaphana buǵan deıin tańerteńgi 8:30-dan keshki 22:00-ge deıingi aralyqta jumys istedi. Munda stýdentter men oqytýshylardyń ǵylymı-zertteýine arnalǵan qazaq, orys, aǵylshyn, tilderinde qyzmet kórsetiledi. Mádenıet oshaǵy halyqaralyq bilim berý júıesi men jańa tehnıkalyq ınnovatsııalardy engize otyryp, álemdik deńgeıdegi kitaphana bolýdy kózdep otyr.
