Atyraý: «Halal Damý» dırektory óńir ımamdarymen kezdesti (FOTO)

Atyraý oblysyna arnaıy jumys sapary aıasynda Qazaqstan musylmandary dinı basqarmasy «Halal Damý» halal standarttaý jáne sertıfıkattaý mekemesiniń dırektory Aıbek Atashev atyraýlyq ımamdarmen kezdesti. 

Kezdesý barysynda adal as ishýdiń ıslamdaǵy, jalpy adam saýlyǵyna paıdasy haqynda aıtyldy. 

«Imamdarymyz halyq arasynda kóp júredi. Demek, adal astyń mańyzy týraly da nasıhat kóbirek aıtylýy kerek. Adal júrip, adal nesibe tabýdy buıyrǵany sekildi, ıslam dininde adal as ishýdiń mańyzy óte zor. 

Sonymen birge, adamdar kóp shoǵyrlanatyn qoǵamdyq tamaqtaný oryndarynyń halal standartyn alǵandyǵyna da mańyz bergenimiz jón. 

Jalpy alǵanda, sońǵy jyldary halyqtyń «halal, haram» jóninde málimeti artyp, tutynatyn ónimderiniń adaldyǵyna asa uqyptylyq tanytýda. Sondaı-aq, halal asqa suranys artyp keledi. Bul atqarylyp jatqan ortaq jumysymyzdyń nátıjeli kórinisi» dep atap ótti Aıbek Atashev.