Atyraý: Jazasyn óteýshige Bas múftıdiń amanaty tapsyryldy
«Jýsan» operatsııasy arqyly elge oralyp, Sırııa jerinde jas ómirin ári densaýlyǵyn qurban etip kelgen E. esimdi jazasyn óteýshige Bas múftı Naýryzbaı qajy Taǵanulynyń amanaty – múgedektik qolarbasyn Atyraý oblysynyń bas ımamy Altynbek Utyshanuly arnaıy aparyp berdi.
Buǵan deıin Atyraý oblysyna jumys saparymen kelgen Bas múftı Naýryzbaı qajy Taǵanuly qaladaǵy 66-túzetý mekemesine arnaıy baryp, «Jýsan» operatsııasy arqyly elge oralǵan, 8 jylǵa bas bostandyǵynan aıyrylǵan E.A esimdi azamatpen arnaıy kezdesken edi. Sırııaǵa ketken bul azamat arqasynan jaraqat alǵan eken. Jaqynda ǵana operatsııa jasatyp, qazir júrýge jaramaı qalǵan. Osyny eskergen Bas múftı E.A.-ǵa arnaıy qolarba alyp berýge ýáde etken bolatyn.
«Biz yqylym zamannan Ábý Hanıfa mázhabyn ustanǵan halyqpyz. Dinimiz ben dilimizge berik bolsaq, bizdi syrttan jaý almaıdy. Qazaq baýyryn ólimge qımaǵan halyq. «Adasqannyń aıyby joq, úıirin qaıta tapqan soń» dep baýyrǵa basatyn da qazaq. Bas múftı Naýryzbaı qajy Taǵanuly qazaqtyń kóregendigin, baýyrmaldyq qasıetin taǵy bir pash etip otyr» dedi Altynbek Utyshanuly.
