Atyraýǵa jańa ókil ımam taǵaıyndaldy (FOTO)

Búgin Atyraýda Qazaqstan musylmandary dinı basqarmasynyń Atyraý oblysy boıynsha jańa ókili taǵaıyndaldy. Bas múftı Serikbaı qajy Orazdyń buıryǵyn juma namazy aldynda QMDB-nyń Dinı bilim jəne kadr daıarlaý bóliminiń basshysy Beıbit Myrzageldıev tanystyrdy.

Buǵan deıin Qazaqstan musylmandary dinı basqarmasynyń Atyraý oblysynyń Bas ımamy qyzmetin atqaryp kelgen Batyrjan Mansurov  endi múftııattyń «Nasıhat jáne qoǵammen baılanys» bólimine basshylyq etedi. Al, Qazaqstan musylmandary dinı basqarmasynyń Atyraý oblysy boıynsha ókili, ortalyq «Imanǵalı» meshitiniń Bas ımamy laýazymyna «Nur - Múbárak» Egıpet Islam mádenıeti ýnıversıtetiniń túlegi, magıstr Altynbek Utyshanuly taǵaıyndaldy.

Jamaǵatqa Bas múftı Serikbaı qajy Orazdyń sálemin jetkizgen QMDB-nyń Dinı bilim jəne kadr daıarlaý bóliminiń basshysy Beıbit Myrzageldıev munaıly astananyń azamattary jańa ımamdy keń peıilmen qarsy alyp, qoldaıtynyna senim bildirdi.

Jáne QMDB-nyń «Nasıhat jáne qoǵammen baılanys» bólimine basshylyqqa taǵaıyndalǵan ustaz Batyrjan Mansurovqa Bas múftı Serikbaı qajy Orazdyń alǵys hatyn tabys etti. 

Munaıly ólkede alty jylǵa jýyq bas ımamdyq qyzmetti atqarǵan ustaz Batyrjan Mansurov osynaý ýaqyt ishinde atqarylǵan ıgi isterdiń bastaýynda jergilikti jamaǵat, Atyraýdyń halqy turǵanyn atap ótip, jurtshylyqqa rızashylyǵyn jetkizdi.

Meshit aqsaqaldary atynan sóz alǵan  belgili metsenat Tóken Tanauly ustaz Batyrjan Mansurovtyń jergilikti dinı mamandar daıyndaý, meshitterdi bilikti kadrlarmen qamtamasyz etý jáne meshit salý isinde erekshe eńbek sińirgendigin atap ótti. Budan soń ustaz Batyrjan Mansurovqa aq jol tilep, bata berdi.

Altynbek Utyshanuly Mońǵolııa memleketiniń Baıan Ólgıı aımaǵynda dúnıege kelgen.

1993-1996 jyldar aralyǵynda Aqmola oblysy, Sileti aýdanyndaǵy meshittiń janynan ashylǵan medresede dinı saýat ashý kýrsynda dáris alǵan.

1996-2001 jyldar aralyǵynda Aqmola oblysy, Aqkól aýdany, Iskra eldi mekenindegi meshitte ımamdyq qyzmet atqarǵan. 2001-2005 jyldar aralyǵynda Almaty qalasyndaǵy «Nur-Múbárak» Egıpet Islam mádenıeti ýnıversıtetiniń «Islamtaný» mamandyǵy boıynsha támamdaǵan.

2005-2009 jyldar aralyǵynda Mysyr memleketindegi «Arab tili ortalyǵynda» jáne «Maǵhad alı lıddırasatıl ıslamııá» dep atalatyn oqý ornynda magıstrlik boıynsha dáris alǵan.

2013 jyly Almaty qalasyndaǵy «Nur-Múbárak» Egıpet Islam mádenıeti ýnıversıtetiniń «Islamtaný» mamandyǵy boıynsha magıstrlik dıssertatsııa qorǵaǵan.

2009 jyly elge oralyp, Qazaqstan musylmandary dinı basqarmasynyń Ýaǵyz-nasıhat bóliminiń mamany bolyp jumys istegen.

2017 jyldyń qazan aıynan bastap «Nasıhat jáne qoǵammen baılanys bóliminiń» meńgerýshisi qyzmetin atqardy.