ÁIEL JAMAǴATYNA DEMALYS UIYMDASTYRYLDY (FOTO)

Búgin «Áziret Sultan» meshiti ustazdarynyń uıymdastyrýymen  bıylǵy oqý jylyn jemisti aıaqtaǵan áıel shákirtterge «BalQaragai» demalys orynynda rýhanı oıyn-saýyq sharasy uıymdastyryldy.

Tańerteń meshit aýlasynan attanǵan 200 shákirt bir mezette qaladan 21 km qashyqtyqta ornalasqan demalys keshenine júrip ketti. Úsh avtobýsqa bólingen ustazdar jol boıy Paıǵambarymyzdyń kezeńinen ǵıbratty oqıǵalar aıtyp, búgingi kúnniń berekeli bolýyn tiledi. Demalys orynyna jetkennen keıin ustazdardyń ýaǵyzymen kórkemdelgen tańǵy as, odan keıin jamaǵatpen birigip, yntymaqqa úndeıtin Estafetalyq oıyndar oınatyldy. Toppen uıymdastyrylǵan oıyndar da, túski asta da, tabıǵat aıasyndaǵy pıknıkte de ustazdar ár istiń hıkmetin aıta otyryp, ýaǵyz-nasıhat júrgizdi.

Búgingi qoǵamdyq sharanyń ótýine uıytqy bolǵan Astana qalasynyń jáne «Áziret Sultan» meshitiniń bas ımamy Júsipov Erbolat Nuryldauly arnaıy kelip, shákirtterdi Quran úırenýdegi jetistikterimen quttyqtap, áıel adam úshin bilim alýdyń qanshalyqty mańyzdy ekenin atap ótti. Ol Quran úırenýdiń artyqshylyǵy týraly ýaǵyz-nasıhatynan keıin meshit ustazdary Elmıra Serikbaıqyzy, Zarına Shamıdýllaqyzy, Ásel Dúısebekqyzy, Mýhlısa Saıdýllaqyzy jáne Tatıana Syshenkoǵa óz alǵysyn bildirip, shákirtterdiń aldynda ustazdarynyń mártebesin kóterdi.

Baýyrmashylyqty arttyryp, Allany eske alýmen berekeli ótken kún úshin shákirtter de óz rızashylyqtaryn bildirdi.

Aıta keteıik, ótken aptada bıylǵy oqý jylyn sátti aıaqtaǵan 400 shákirt qorytyndy emtıhan tapsyrǵan bolatyn.

Источник: Aidos