«ÁZIRET SULTAN» MEShITINDE MÁÝLIT OQYLDY (FOTO)

Búgin, qasıetti juma kúni Elordadaǵy «Áziret Sultan» meshitinde Máýlit merekesi atalyp ótti. Kúnderdiń sultany bolǵan jumadaǵy Máýlit merekesi jamaǵatty Paıǵambarymyzdyń (s.ǵ.s.) súıikti jemisi – qurma jáne zámzám sýymen qarsy alyp, arnaıy duǵalar jazylǵan qalta qaǵazdaryn syılaýmen bastaldy.

Jumaǵa jıylǵan jamaǵatqa ardaqty Paıǵambarymyz týylǵan máýlit aıynyń qadir-qasıeti týraly aıtylyp, máýlit jyrynyń mańyzyna túsindirildi. Budan soń Máýlit jyry oqylyp, súıikti Paıǵambarymyzǵa (s.ǵ.s.) sansyz salaýattar joldandy.

Qasıetti Quran Kárimde Alla Taǵala: «Rasynda, Alla jáne perishteler Paıǵambarǵa salaýat aıtady. Áı, múminder! Oǵan salaýat jáne yqylaspen sálem keltirińder», – dep buıyrady. Al, Alla Elshisiniń (s.ǵ.s.) ózi: «Qııamette maǵan eń jaqyn adam – maǵan kóp salaýat aıtqan adam», – degen eken.

Qulshylyq ordasynyń ishin múminderdiń rııasyz aıtqan salaýattary men Paıǵambarymyzǵa (s.ǵ.s.) degen súıispenshiligi toltyryp, Máýlit merekesiniń shýaǵy jaıyla tústi. Jamaǵatpen birge jasalǵan duǵa da elimiz ben jerimizdiń amandyǵyn surap, Paıǵambarymyzdyń (s.ǵ.s.) shapaǵaty násip bolýyn tileýmen aıaqtaldy.