«BABALAR IZIMEN: QAZAQ DALASYNDAǴY MUSYLMANDYQ MEKTEP» KITABY JARYQ KÓRDI (FOTO)
Búgin Astanada Qazaqstan musylmandary dinı basqarmasynyń ǵımaratynda «Babalar izimen: Qazaq dalasyndaǵy musylmandyq mektep» kitabynyń tanytymy ótti. Is-sharaǵa ǵalymdar, jazýshylar, tarıhshylar, depýtattar men zııaly qaýym ókilderi qatysty.
Jańa kitap tanytymynda birinshi sóz alǵan Bas múftı Naýryzbaı qajy Taǵanuly: «Ózderińiz jaqsy bilesizder, Qazaqstan musylmandary dinı basqarmasy sońǵy jyldary dástúrli tanymdarǵa erekshe nazar aýdaryp keledi. Babalarymyz ustanǵan sara joldy nasıhattaýdaǵy basty maqsatymyz – keleshek urpaǵymyzǵa ǵasyrlar boıy qalyptasqan ulttyq jáne dinı qundylyqtarymyzǵa negizdelgen dástúrli dinimizdiń negizderin jetkizý. Sebebi dástúrli dinimizben kókirek kózin sýarǵan jastar jat aǵymnyń jeteginde kete qoımasy anyq. Osy salada birneshe jobalar qolǵa alyndy.
Sonyń biri «Babalar izimen: Qazaq dalasyndaǵy musylmandyq mektep» kitabyn shyǵarý bolatyn. Bul eńbekte asyl dinimiz ıslamnyń Qazaq dalasyna kelý tarıhy, halqymyzdyń ádet-ǵurpy men salt-dástúrindegi dinniń alar orny men babalar ustanǵan sharıǵat paryzdary, ıman negizderi, sondaı-aq musylmandyq ádep joralǵylary qamtyldy. Kitap úsh bólimnen turady. Birinshi bólim «Dástúrli dinı tanymnyń tarıhı negizderi» dep atalady. Ekinshi bólim dástúrli dinı tanym ustyndaryna arnaldy. Al úshinshi bólimde din men dástúr sabaqtastyǵy keńinen jazylǵan», – dedi.
Is-sharaǵa qatysqan memleket jáne qoǵam qaıratkerleri múftııattyń ıgi bastamasy jaıly jyly pikirlerin jetkizip, izgi nıetterin bildirdi. Basqosý barysynda babalar rýhyna Quran baǵyshtalyp, Bas múftı arnaıy duǵa jasady.
Derekkóz: QMDB Baspasóz qyzmeti
Источник: Aidos
