BAS IMAMNYŃ QATYSÝYMEN ÓKILDIKTIŃ JYL SOŃYNA DEIINGI JOSPARY PYSYQTALDY

Astana qalasynyń Bas ımamy Nurbek qajy Áýeshanulynyń qatysýymen ókildiktiń jyl sońyna deıingi jumys jospary naqtylandy. Aıtýly jıynǵa qala ımamdary, din qyzmetkerleri qatysty. Bas ımam negizinen tamyz-jeltoqsan aıynyń aralyǵynda belgilengen is-sharalarǵa toqtalyp, QMDB tarapynan bekitilgen aıtýly konferentsııalardy da atap ótti.

«QMDB basymdyq berip, Naýryzbaı qajy Taǵanuly hazirettiń «Baǵdarlyq baıandamasynda» aıtylǵan tórt baǵyttaǵy jumys atap aıtqanda, ıhsan jáne nasıhat, dinı oqý-aǵartý, dástúr jáne otbasy, jat dinı aǵymdardan saqtandyrý is-sharalary árkez nazarda bolýy tıis.

Tamyz aıynyń sońy Máýlit merekesiniń ýaqyty. Máýlit merekesin buıyrsa jyldyq josparda kórsetilgendeı ulttyq naqyshta toılaý jaǵyn qarastyrýymyz kerek. Tól ónerimizdi kórsetip, ulttyq kıim kıip, ardaqty Paıǵambarymyzdyń ómirin bizdiń dástúrli ıslam baǵytynda kórsetsek deımiz. Oǵan qazir daıyndyq bastaldy. 

Taǵy bir mańyzdy is-sharamyz bar. Ol – «Úzdik ımam» ıntellektýaldy saıysy. Odan keıin elordada «Fıqh jáne zamanaýı medıtsına» taqyrybynda dóńgelek ústel qyrkúıek aıynda ótýi tıis.

Qyrkúıek aıynda sonymen qatar «Ulaǵatty ustaz kelbeti» forýmyn uıymdastyrý mindeti tur. Rýhanı kitap aılyǵy is-sharasy da óte mańyzdy. Oqý-aǵartýǵa jaýapty ımamdar ár meshitte tipti jamaǵat arasynda kitaphanada kezdesý uıymdastyrylýyn qaperge alsańyzdar.

«Islam jáne adal qoǵam» jyly aıasynda meshitter adaldyqtyń mańyzyn nasıhattap, ádiletti qoǵam, adaldyq ólshemi týraly hıkmetke toly kezdesýler, ýaǵyz-nasıhat, ıntelektýaldy kýızder uıymdastarý kerek» - dedi Bas ımam.

Sondaı-aq jıynda meshitterdegi tártip pen qaýipsizdik máselesi de sóz boldy.

«Meshitke qatysty aıtylýy tıis máseleniń biri – qaýipsizdik sharalaryn qatań saqtaý. Kúzet qyzmeti, kezekshi ımamdar meshitterde tehnıkalyq jáne órt qaýipsizdik is-sharalaryna basymdyq berilýin baqylaýda ustaý kerek. Sondaı-aq qulshylyq úıleriniń tazalyǵy da mańyzdy» - dedi Nurbek qajy Áýeshanuly.

Jıyn barysynda negizgi is-sharalardyń kúni belgilenip, ókildikke tıisti is-sharalar qala meshitterine bólinip berildi. Bas ımam sóz sońynda berilgen tapsyrmanyń júıeli ári sapaly ótýine barsha din qyzmetkerleriniń yqylas tanytýy mańyzdy ekenin atap ótti.

Источник: Aisha