BAS MEShITTE «KÓREGEN ENE, IBALY KELIN» BAIQAÝY ÓTTI
QMDB janyndaǵy Respýblıkalyq bas meshitte «Islam jáne dástúr qundylyǵy» jyly aıasynda Astana qalasy meshitteriniń áıel-qyzdar jamaǵatynan quralǵan komandalar arasynda «Kóregen ene, ıbaly kelin» meshitaralyq baıqaýy ótti.
Baıqaý aldynda Bas meshit ustazdarynyń uıymdastyrýymen «Dástúrim – qazynam» qolóner kórmesi tamashalandy. Kórmede urshyq ıirý, jún tútý, toqyma toqý sekildi ulttyq qolóner buıymdary men olardy tutyný tásilderi kórsetildi.
Meshitaralyq baıqaýdyń shymyldyǵyn QMDB tóraǵasy, Bas múftı Naýryzbaı qajy Taǵanuly ashyp berip, din men dástúrdiń sabaqtastyǵy, Islammen gúldengen ulttyq mádenıetimizdi nasıhattaýdyń ózekti ekendigin atap ótip, komandalarǵa sáttilik tiledi.
Elordanyń 6 meshiti saıysqan baıqaý 4 kezeńnen turdy: «Men qazaqtyń kelinimin, anasymyn» dep atalatyn 1-kezeńde komandalar ózderin kreatıvti tanystyrýdan baq synassa, «Salt-dástúrim – taýsylmaıtyn baılyǵym» atty 2-kezeńde ulttyq ǵurpymyzdyń bir bólshegi – «qyz jasaýy» dástúrinen qoıylymdar kórsetildi. «Ónermen órge júzermiz» dep atalatyn 3-kezeń komandalardyń óz ónerlerin kórsetýimen baıqaý kórkin qyzdyra tústi. 4-kezeńde («As – adamnyń arqaýy») áıel balasynyń as-taǵam daıyndaý óneri synǵa túsip, ulttyq taǵamdar ádilqazylar talqysyna tústi.
Baıqaý barysynda kórermender de nazardan tys qalmaı, suraqtar qoıylyp, aýdıtorııa jaýaptaryna syılyqtar úlestirildi. Enesi jáne kelini saıysqa túsken baıqaý qorytyndysy boıynsha bas júldeni «Sádýaqas qajy Ǵylmanı» meshiti ıelense, 1-oryndy Áziret Sultan meshiti, 2-oryndy «Aqmeshit» meshiti, 3-oryndy «Yryskeldi qajy» meshiti jeńip aldy. Jeńimpazdarǵa dıplomdar men baǵaly syılyqtar, qalǵan komandalarǵa yntalandyrý syılyqtary tabystaldy.
