Bas meshitte Shaǵban aıynyń qurmetine aýyzashar berildi (FOTO)

Keshe Astana qalasyndaǵy respýblıkalyq «Áziret Sultan» meshitinde Shaǵban aıynyń qurmetine oraı aýyzashar dastarhany jaıylyp, ǵıbratty otyrys ótti. Elorda ımamdary men «Astana» medresesiniń shákirtteri, meshit jamaǵaty bas qosqan berekeli dastarhan basynda keleli ýaǵyz aıtylyp, kelgen jandar rýhanı azyqqa da molynan keneldi.

Ardaqty Alla elshisi (s.ǵ.s.) «adamdardyń kópshiligi Erejep pen Ramazan aılarynyń ortasynda mán bermeı ketetin aı» dep, sahabalaryna úlgi bolyp eń kóp oraza ustaıtyn aı osy Shaǵban aıy bolǵan. Sondaı-aq, Súıikti paıǵambarymyzdyń (s.ǵ.s.) súnnetine saı dúısenbi kúnine oraı jaıylǵan dastarhan qonaqtarynyń qatary kóńil súısintip, kóz qýantty. Alla razylyǵy úshin aq dastarhan jaıyp, adal nıetpen jasaǵan isiniń jasyryn bolýyn qalaǵan jandardyń izdegen saýaby osy emes pe?!

Qasıetti Quran aıattary oqylyp, ǵıbratty ýaǵyz-nasıhat aıtylyp, aınala aqjarqyn adamdardyń rııasyz kúlkisi men salıqaly áńgimelerine toly ótken aýyzashar dastarhany osylaısha Elorda jamaǵatyn Ramazan aıyna bir daıyndap aldy. Muhammed paıǵambarymyz (s.ǵ.s.) bir hadısinde «Shaǵban aıy kirgende, ózderińizdi tazalańyzdar jáne nıetterińizdi durystańyzdar» dep ósıet etken eken. Qasıetti Ramazanǵa degen saǵynyshty eselep, talpyndyra túsken aýyzashar dastarhanynan biz de erekshe áserlenip qaıttyq. Sanamyzda jańa estigen Súıikti paıǵambarymyzdyń (s.ǵ.s.) duǵasy:  «Alla Taǵalam! Erejep pen Shaǵban aılaryn berekeli qyla gór. Bizdi Ramazanǵa aman-esen jetkize gór!»