Bas múftı 10 otbasyǵa baspana kiltin tabystady (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Taldyqorǵan qalasynda «Zeket» qorynyń «El úlesi – páterge» jobasy aıasynda bir mezette 10 muqtaj otbasyǵa páter kiltin tabys etti.
– «Úıi joqtyń – kúıi joq» deıdi burynǵylar. Adamnyń jaǵdaıy tómendese, ımany da álsireýi múmkin. Paryzdarǵa selqos qaraı bastaıdy. Al turmysy túzelip, bala-shaǵasynyń iship-jemine alańdamaǵan adam jaǵdaıy jaqsarǵan saıyn Allaǵa jaqyn keledi. Sadaqasyn, zeketin beredi, qoǵamǵa paıdasyn tıgizedi. Eń bastysy, nıettiń túzýligi, peıildiń keńdigi. Minekı, 10 birdeı muqtaj otbasynyń úıli bolýyna birneshe baýyrymyz úles qosyp, jaqsy iske nıet etken eken. Alla Taǵala barshańyzǵa razy bolsyn! Jańa baspanalardyń ishi berekege tolsyn!, - dedi Bas múftı.
Qýanyshtary qoıynyna syımaǵan jańa baspana ıeleri meshit ımamdaryna, kásipkerlerge alǵystaryn jaýdyryp, rızashylyǵyn bildirdi. QMDB tóraǵasy, Bas múftı Naýryzbaı qajy Taǵanuly da on otbasynyń baspanaly bolýyna sebepker bolǵan jany jomart kásipkerlerge rızashylyǵyn jetkizip, alǵys hat tabystady.
