Bas múftı «30 jyldyq mereıtoıǵa – 30 myń tal otyrǵyzý» aktsııasyna qatysty (FOTO)
Búgin elordada QMDB tóraǵasy, Bas múftı Naýryzbaı qajy Taǵanulynyń qatysýymen respýblıka kóleminde «30 jyldyq mereıtoıǵa – 30 myń túp aǵash otyrǵyzý» aktsııasy ótti.
Bas qalanyń sımvoly sanalatyn «Báıterek» monýmenti mańyndaǵy saıabaqta bastaý alǵan ıgi shara elimizdiń barlyq aımaǵynda meshit qyzmetkerleri jáne erikti jamaǵattyń qoldaýymen jalǵasty.
Tal otyrǵyzýdy bastap bergen Bas múftı Naýryzbaı qajy Taǵanuly:
«Paıǵambarymyz (oǵan Allanyń salaýaty men sálemi bolsyn) bir ósıetinde: «Qoldaryńda bir qurma aǵashynyń shybyǵy bolyp, qııamet kelgen jaǵdaı bolsa da sony otyrǵyzyp úlgerińder» - degen. Bul hadısten aǵash otyrǵyzýdyń mańyzdylyǵyn, tabıǵatty qorǵaýdyń, mańaıymyzdy kógaldandyrýdyń qanshalyqty saýaby bar ekenin túsinýge bolady. «Atadan mal qalǵansha, tal qalsyn» degen de ata-babalarymyzdyń sózi bar. Memleket basshysy Qasym-Jomart Toqaev bıylǵy Joldaýynda el aýmaǵyn kógaldandyrýǵa qatysty aldaǵy bes jylda orman alqaptarynda 1 mıllıardqa jýyq aǵashtyń, al eldimekenderde 15 mıllıonǵa jýyq aǵash otyrǵyzylatynyn aıtyp ótti. Minekı, Paıǵambar súnnetin, babalar sózin keler urpaqqa nasıhattaý úshin ári Memleket basshysynyń Joldaýyndaǵy úndeýge úles qosý úshin Qazaqstan musylmandary dinı basqarmasynyń 30 jyldyq mereıtoıyna oraı el kóleminde 30 myń túp aǵash otyrǵyzýdy bastap kettik. Elordada bastalǵan sharamyz bir mezette óńirlerdiń ımamdary jáne jamaǵatynyń atsalysýymen jalǵasady», - dedi.
Aıta keteıik, QMDB-nyń qurylǵanyna 30 jyl tolýyna baılanysty jer-jerde 30 jetim balaǵa, 30 otbasyna qaıyrymdylyq kómek kórsetý, 30 eldimekenniń aýyz sý, jol-kópir máselesin sheshýge yqpal etý, tarıhı kórmeler uıymdastyrý, QMDB týraly derekti fılm túsirý, ál-Farabı, Abaı syndy tulǵalardyń, el ishinde esimi elenbeı júrgen 30 din qaıratkeriniń esimin meshitke berý, aýyldaǵy 30 meshitti kúrdeli jóndeýden ótkizý, t.b. saýapty da salaýatty sharalardy júzege asyrý josparǵa engizilgen.
Osy bastama aıasynda búgin Nur-Sultan qalasynyń saıabaqtaryna 332 túp aǵash otyrǵyzylsa, respýblıka boıynsha eń kóbi Túrkistan oblysynda 8228 túp aǵash tamyr jaımaq.
