Bas múftı 7 balanyń ákesi, belsendi ımamǵa páter kiltin tabystady (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Atyraý oblysyna barǵan jumys saparynda din qyzmetkeri Ósimhan Tileýovke baspana kiltin tabys etti.

Oblysta 7 jyldan beri eńbek etip kele jatqan Ósimhan Tileýov Atyraý qalasyndaǵy «Át-Taqýa» meshitinde ımamdyq qyzmet atqarady. Jeti balasy bar otbasyǵa Bas múftı úsh bólmeli jańa páterdiń kiltin saltanatty  túrde tabystady.

«Siz dinı ahýal kúrdeli aımaqta tabandy qyzmet etip kele jatqan belsendi  ımamsyz. Osyǵan deıin aıadaı bólmeni jaldap kelseńiz de bizge biraýyz shaǵym bildirmedińiz. Sizdiń dinge, elge degen tabandy qyzmetińiz, eren eńbegińiz ózge ımamdarǵa úlgi bolady dep oılaımyn. Siz marapattyń qaı túrine de laıyqty ımamdardyń birisiz. Mine, kóp jylǵy beınettiń berekesi men jemisin kórip otyrsyz. Alla qýanyshyńyzdy eselep, qonysyńyzdy qutty etsin», –dedi Bas múftı Naýryzbaı qajy Taǵanuly.

Óz kezeginde Ósimhan Tileýov ımamdarǵa áleýmettik turǵydan qoldaý kórsetip kele jatqan Bas múftıge, jomart jandarǵa alǵysyn bildirdi.

Aıta ketsek, bul – Qazaqstan musylmandary dinı basqarmasy «Zeket» qorynyń «El úlesi – páterge» jobasy aıasynda respýblıka boıynsha berilgen 351-inshi baspana. Joba aıasynda Atyraý oblysynda baspanaǵa asa muqtaj 20 otbasyna páter berildi.

«El úlesi – páterge» jobasy áleýmettik jaǵdaıy tómen muqtaj otbasylarmen birge din qyzmetkerlerin baspanamen qamtýdy kózdeıdi.